كومپانيا باسقارما ءتوراعاسى ساۋات مىڭبايەۆ قىزمەتكەرلەردى تاۋەلسىزدىك كۇنىمەن قۇتتىقتاپ، اعىمداعى جىلى كومپانيانىڭ جەتىستىكتەرى مەن قىزمەتىنىڭ ناتيجەلەرىنە توقتالىپ، بولاشاقتاعى جوسپارلارمەن ءبولىستى.
– كوپتەگەن سىناقتار ارقىلى ءجۇرىپ وتكەن جولىمىز بارلىق سالادا قۋاتتى الەۋەتكە يە، تاۋەلسىز مەملەكەتتى قۇرۋعا مۇمكىندىك بەردى. «قازاقستان تەمىر جولى» ۇلتتىق كومپانياسى تەمىرجولشىلاردىڭ كۇن سايىنعى اۋىر جۇمىسىنىڭ ارقاسىندا ەلىمىزدىڭ ترانزيتتىك جانە ەكسپورتتىق الەۋەتىن جۇزەگە اسىرۋعا، كولىك-لوگيستيكالىق ينفراقۇرىلىمىن دامىتۋعا ولشەۋسىز ۇلەس قوسىپ كەلەدى، – دەپ اتاپ كورسەتتى ساۋات مىڭبايەۆ.
سونىمەن، 11 ايدىڭ قورىتىندىسى بويىنشا كومپانيا 286،6 ملن توننادان استام جۇك تاسىمالدادى. قازاقستان ارقىلى وتەتىن بارلىق كولىكتىك دالىزدەر بويىنشا كونتەينەرلىك تاسىمال وسۋدە. 590 مىڭنان استام جفب كونتەينەرلى جۇك تاسىمالدانسا، بۇل 2018 جىلدىڭ سايكەس كەزەڭى قورىتىندىسىنان 26%-عا جوعارى. بۇل رەتتە، ترانزيتتىك تاسىمال شامامەن 15،5 ملن توننانى قۇرادى.
سالتاناتتى جيىن بارىسىندا ساۋات مىڭبايەۆ ءوندىرىس وزاتتارىنا مەملەكەتتىك جانە سالالىق ماراپاتتاردى تابىس ەتتى. قازاقستاننىڭ كولىك-لوگيستيكالىق كەشەنىڭ دامىتۋعا قوماقتى ۇلەس قوسقانى ءۇشىن 21 قىزمەتكەر ماراپاتقا يە بولدى.
ولاردىڭ اراسىندا – «ىرىلەندىرىلگەن ەسىل جول ديستانسياسىنىڭ» جول مونتەرى جۇماباي راحمەتوۆ، «جامبىل ماگيسترالدىق جەلى بولىمشەسىنىڭ» سەز ماستەرى ەرعالي سوقەنوۆ، استانا جول ديستانسياسىنىڭ وندىرىستىك وقىتۋ ماستەرى ەركەن سارسەبايەۆ جانە وزگەلەرى بار.
جالپى بارلىق تەمىر جول بويىنشا مەملەكەتتىك جانە سالالىق ناگرادالارعا 600 استام تەمىرجول قىزمەتكەرى يە بولدى.
سونداي-اق «قتج» ۇك» اق باسشىسى «قتج-نىڭ 100 جاس تۇلعاسى» رەسپۋبليكالىق سايىسىنىڭ جەڭىمپازدارىن قۇتتىقتادى، ولاردىڭ 13ء-ى «يننوۆاسيا»، 47ء-سى – «الەۋمەتتىك جاۋاپكەرشىلىك» جانە 40-ى «كاسىبيلىك» نوميناسيالارىنىڭ جەڭىمپازدارى.
– كومپانيانىڭ 100 جاس قىزمەتكەرى بولاشاق باسشىلىق رەزەرۆىنە الىندى. بۇل التىن جاستار – كومپانيانىڭ جارقىن بولاشاعى! ءبىز ارى قاراي دا ولاردىڭ جاسامپازدىق الەۋەتىن اشۋ، جاس قىزمەتكەرلەردى يننوۆاسيالىق قىزمەتكە تارتۋ، كاسىبي ءوسۋى ءۇشىن جاعداي قۇرۋعا باعىتتالعان جاستار ساياساتى باعدارلامالارىن جۇزەگە اسىرۋعا ۇلكەن كوڭىل بولەتىن بولامىز، – دەدى ساۋات مىڭبايەۆ.
سالتاناتتى جيىن سوڭىنان تەمىر جول ەڭبەككەرلەرى «قتج» ۇك» اق ءوز قىزمەتكەرلەرىنىڭ ەرىك-جىگەرىمەن ازىرلەنگەن مەرەكەلىك كونسەرتتى تاماشالادى.
«قازاقستان تەمىر جولى» ۇك» اق باسپا ءسوز قىزمەتى
