اقپاننىڭ 26-سىنا قاراعان ءتۇنى ميليسيانىڭ ارنايى بولىمشەسىنىڭ قىزمەتكەرلەرى 10 ادامدى ۇستاعان. ولار بۇگىن تاڭعى ساعات ءۇش كەزىندە ۆەنادان ورالعان «اتا مەكەن» پارتياسى پارلامەنتتىك فراكسياسى جەتەكشىسى ومۋربەك تەكەبايەۆتى بىشكەك حالىقارالىق اۋەجايىندا ۇستاعان بيلىكتىڭ ىسىنە نارازىلىق بىلدىرمەك بولعان ەدى. وزگەلەرمەن بىرگە ازاتتىق ءتىلشىسى ۇلان ەگىزبايەۆ پەن پارلامەنتتەگى «اتا مەكەن» فراكسياسى مۇشەسى كانىبەك يمانالييەۆتى دە ۇستاعان دەپ حابارلايدى ازاتتىقتىڭ قىرعىز قىزمەتى.
قىرعىزستان پرەزيدەنتىنىڭ ساياسي وپپونەنتى 58 جاستاعى ومۋربەك تەكەبايەۆتى وعان قاتىستى وسىدان ءبىر كۇن بۇرىن «الاياقتىق» جانە «جەمقورلىق» باپتارى بويىنشا قوزعالعان قىلمىستىق ءىس نەگىزىندە 48 ساعاتقا ۇستاعان. بۇگىن بىشكەكتە جانە قىرعىزستاننىڭ وڭتۇستىگىندە تەكەبايەۆتى قولداۋ اكسيالارى ءوتتى.
ازاماتتىق بەلسەدى ءادىل تۋردۋكۋلوۆتىڭ ازاتتىققا ايتۋىنشا، بىشكەكتە جينالعاندارعا ءتۇن قاراڭعىسىندا ءتۇرلى ارانداتۋ جاسالۋى مۇمكىن ەكەنىن ايتىپ، تاراۋدى ۇسىنعان. بۇگىن كۇنى بويى بىشكەكتەگى مەملەكەتتىك ۇلتتىق قاۋىپسىزدىك قىزمەتى عيماراتى الدىندا نارازىلىق شەرۋىن وتكىزگەندەر اقپاننىڭ 27ء-سى كۇنى اق ءۇيدىڭ الدىنا قايتادان جينالماق نيەتتە دەپ حابارلادى ازاتتىققا بەلسەندى ماۋلەن اسقاربەكوۆ. بۇعان دەيىن «اتا مەكەن» پارتياسى دۇيسەنبى كۇنى ىستىقكولدەن بىشكەككە پارتيا وكىلدەرى كەلەتىنى تۋرالى حابارلاعان.
دەرەككوز: ازاتتىق
