Aqpannyń 26-syna qaraǵan túni militsiianyń arnaiy bólimshesiniń qyzmetkerleri 10 adamdy ustaǵan. Olar búgin tańǵy saǵat úsh kezinde Venadan oralǵan «Ata Meken» partiiasy parlamenttik fraktsiiasy jetekshisi Omýrbek Tekebaevty Bishkek halyqaralyq áýejaiynda ustaǵan biliktiń isine narazylyq bildirmek bolǵan edi. Ózgelermen birge Azattyq tilshisi Ulan Egizbaev pen parlamenttegi «Ata Meken» fraktsiiasy múshesi Kanybek Imanalievti de ustaǵan dep habarlaidy Azattyqtyń Qyrǵyz qyzmeti.
Qyrǵyzstan prezidentiniń saiasi opponenti 58 jastaǵy Omýrbek Tekebaevty oǵan qatysty osydan bir kún buryn «alaiaqtyq» jáne «jemqorlyq» baptary boiynsha qozǵalǵan qylmystyq is negizinde 48 saǵatqa ustaǵan. Búgin Bishkekte jáne Qyrǵyzstannyń ońtústiginde Tekebaevty qoldaý aktsiialary ótti.
Azamattyq belsedi Ádil Týrdýkýlovtyń Azattyqqa aitýynsha, Bishkekte jinalǵandarǵa tún qarańǵysynda túrli arandatý jasalýy múmkin ekenin aityp, taraýdy usynǵan. Búgin kúni boiy Bishkektegi memlekettik ulttyq qaýipsizdik qyzmeti ǵimaraty aldynda narazylyq sherýin ótkizgender aqpannyń 27-si kúni Aq úidiń aldyna qaitadan jinalmaq niette dep habarlady Azattyqqa belsendi Máýlen Asqarbekov. Buǵan deiin «Ata Meken» partiiasy dúisenbi kúni Ystyqkólden Bishkekke partiia ókilderi keletini týraly habarlaǵan.
Derekkóz: Azattyq
