[caption id="attachment_29748" align="aligncenter" width="477"]
![](/uploads/images/20240128014921943.jpg)
"وقۋدى ءبىتىرىپ، ءبىر ءۇيدىڭ بالالارىنداي بولعان كۋرستاستار جان-جاققا بىتىراي باستاعان كەز بولاتىن...
ءبىزدى ۇنەمى دىنگە تارتىپ ۋاعىز ايتاتىن ءقايسىبىر كۋرستاستارىم بىردە مەنى مۇحامەدجان تازابەكپەن كەزدەسۋگە الىپ باردى.
"ءبىزدىڭ سوزىمىزگە نانباساڭ، بىزدەن دە مىقتىلاردىڭ ۋاعىزىن تىڭداپ كور" دەدى. كەلىستىم. الماتىداعى "بايقوڭىر" كينوتەاترىنىڭ قاسىنداعى حالال كافەنىڭ ۆيپ بولىمىنە باردىق. استا-توك داستارحان جايىلعان. ول كەزدە تەليەۆيزياعا بەيىم كۋرستاستارىمنىڭ بەكبولات تىلەۋحان مەن مۇحامەدجان تازابەك تۋرالى اۋىزدارىنان سۋى قۇرىپ، جەر-كوككە سىيعىزباي ماقتاۋ-ماداقتاۋىن تالاي ەستىپ جۇرگەن كەزىمىز.
ءوزىمىز دە الگى "كوسەمدەردىڭ" ءدىن تۋرالى ۋاعىزدارىن تالاي ەستىپ، تەلەفونعا كوشىرىپ الىپ قايتا-قايتا تىڭدايتىنبىز. ءتىپتى تۋعان-تۋىس، كورشىلەرگە دە قوسىپ بەرىپ، مۇحامەدجان تازابەكتىڭ "دىن-دىڭگەگىمدى" تالاي ەستىتكەنىم ەسىمدە.
الگى كۋرستاستاستارىمىزبەن، ءبىر ناندى ءبولىسىپ جەگەن دوستارمەن بارا-بارا قارىم-قاتىناسىمىز بۇرىنعىداي بولماي بارا جاتتى. ولاردىڭ ۋاعىزدارى ءبىر سارىندى. قۋالاپ كەلگەندە سول دوستارىمىز ءسالت-داستۇردى ناداندىق دەپ تانيتىندىقتارىن اڭعارتادى. سودان قىزىلكەڭىردەك بولىپ ايتىسىپ جاتقانىمىز...
سوندا اتاعىنان ات ۇركەتىن، ۇنەمى جاستاردى يماندىلىققا تارتىپ جۇرەتىن بەكبولات تىلەۋحان مەن مۇحامەدجان تازابەكتى جاماندىققا قيمايتىنمىن. شاكىرتتەرى ولاردىڭ تاعىلىمدارىن دۇرىس تۇسىنبەگەندىكتەن قازاقتىڭ ءداستۇرىن، ءتول مادەنيەتىن جوققا شىعاراتىن بولار دەپ ۇنەمى ولاردى اقتاپ الۋعا بالاڭ كوڭىلىمىز دايىن تۇراتىن.
الگى كافەنىڭ ۆيپ زالىندا ءبىر توپ جاستار جينالدىق. ءبىر كەزدە مۇحامەدجان اعامىز كىردى. اماندىق-ساۋلىقتان كەيىن ول كىسى ۋاعىز ايتۋدى باستاماستان بۇرىن "مۇندا ءبارى ءوزىمىز بە؟" دەپ سۇرادى. بىر-بىرىنە قاراعان جاستار "ءوزىمىز-وزىمىز..." باس شۇلعىستى. ەشكىم "مۇندا ارتىق ادام بار ەدى" ايتپاسى تۇسىنىكتى عوي. ارمەن قاراي بەلگىلى ۋاعىز ايتۋ جۇمىسى باستالىپ كەتتى. ۇزاققا سوزىلعان ۋاعىزدان جالعىز ۇققانىم "اقيدانى وقۋىمىز كەرەك" ەكەن. سودان ءبىز "اداسىپ" ءجۇر ەكەنبىز.
مەن تۇك بىلمەيتىن كەيىپتە "كەلىننىڭ ءيىلىپ سالەم سالۋى دۇرىس پا؟" دەپ سۇرادىم. مۇحامدجان اعامىز "ادام قۇدايعا عانا ءيىلۋ كەرەك، قالعانىنىڭ ءبارى شيرك، سەرىك قوسۋ، ەڭ ۇلكەن كۇنانىڭ ءبىرى - قۇدايعا سەرىك قوسۋ" دەپ توتەسىنەن سوقتى.
ودان كەيىن قازاقتىڭ ۇلتتىق اسپاپتارى تۋرالى سۇرادىم. ءبىر كەزدە باقسىلاردىڭ قۇرالى بولعان مۋزىكالىق اسپاپتارىمىز دا "ناداندىقتىڭ"، "بىلىمسىزدىكتىڭ" بەلگىسى ەكەن. باياعى احيدانى وقىماعاننىڭ "سالدارى".
قىسقاسى، سول كەزدەسۋدە كوزىمىز اشىلدى. ۋاعىزشىل كۋرستاستارىما "ۆيرۋستىڭ" قايدان كەلىپ جاتقانىن سوندا انىق كوز جەتكىزىپ قايتتىم..." دەپ جازعان ەكەن ارمان اۋباكىروۆ.
بۇدان بۇرىن...
ايتا كەتسەك، بۇدان بۇرىن زاڭگەر ايگۇل ورىنبەك تازابەكوۆتىڭ ۇستانىمىنا قاتىستى پىكىر بىلدىرگەن.
"كەشە عانا اتى شۋلى تەرروريستتىڭ پوستىن ءبولىسىپ وتىرعان مۇحامەدجان اعامدى ۇلتتىق ارنادا جاڭا اشىلىپ جاتقان ءدىني باعدارلاماعا جۇرگىزۋشى قىلماقشى ەكەن...
بۇل راس اقپارات پا؟ ۇلتتىق ارنا باسشىسى ەرلان كارين اعا سىزگە سۇراق!
ۇقك، ءدىن مينيسترلىگى نە قاراپ وتىرسىزدار ؟ الدە تازابەكوۆتىڭ كىم ەكەنىن بىلمەيسىزدەر مە؟ ول ءقازىر ءوزىنىڭ حانافيت ەكەنىن ايتىپ حالىقتى الداپ وتىر. اسىل ارنادا سالافي ۋاعىزشىسى دارىن مۇباروۆتىڭ مۇحاممەدجانمەن بىرگە وتىرعان ۆيدەوسى يۋتۋبتا تۇر. مۇحاممەدجاننىڭ قايناعاسى بەكبولاتتىڭ دارىندى ۇستازىم دەپ ايتقانى، ءۋاحاۆيزيمدى ءبىزدى قۇتقاراتىن ءدىن دەپ ايتقانى بولەك اڭگىمە. ول دا يۋتۋبتا تۇر. يمام قانات جۇماعۇلوۆتىڭ 2 جىل بۇرىن فەيسبۋك پاراقشاسىندا جاريالاعان مىنا سۇراقتارىنا ءالى كۇنگە دەيىن ءلام-ميم دەپ جاۋاپ بەرگەن جوق. ءۇنسىز قۇتىلۋعا تىرىستى" – دەپ جازعان ايگۇل ورىنبەك.
جازبا اۆتوردىڭ الەۋمەتتىك جەلىدەگى پاراقشاسىنان الىندى
(رەداكسيا كوزقاراسى مەن اۆتوردىڭ پىكىرى سايكەسە بەرمەيتىنىن ەسكەرتەمىز)