اقش كونگرەسى قاداعالاۋ كوميتەتىنىڭ ءتوراعاسى جەيمس كومەر ەل پرەزيدەنتى جوزەپ بايدەننىڭ قارجى وپەراسيالارى تۋرالى بايانداما جاساپ، ۆيسە-پرەزيدەنت تۇسىندا بايدەن اۋلەتىنىڭ قازاقستان كاسىپكەرلەرىنەن قوماقتى قاراجات العانىن مالىمدەدى.

Fox News جازۋىنشا، بايانداما بانك جازبالارىنىڭ سكرينشوتتارى بار.

«كوميتەت ساراپشىلارى بايدەن اۋلەتىنىڭ ەسەپ-شوتىنا جۇڭگو، قازاقستان، رەسەي جانە ۋكراينادان ميلليونداعان دوللار اۋعانىن انىقتادى. پرەزيدەنت وتباسىنىڭ مۇنىڭ قايتارىمى رەتىندە قانداي قىزمەت كورسەتكەنىن انىقتاۋ ۇستىندەمىز. 20 ملن دوللار از اقشا ەمەس...» دەلىنگەن قۇجاتتا.

بەلگىلى بولعانداي، "ەسكى قازاقستاننىڭ" وكىلى، وليگارح كەڭەس راقىشيەۆتىڭ ترانزاكسيالارى وسى ەسەپكە ىلىككەن.

راقىشيەۆ قازاقستاندىق كاسىپكەر، Fincraft Group حولدينگىنىڭ پرەزيدەنتى، Net Element، Fastlane Ventures ديرەكتورلار كەڭەسىنىڭ مۇشەسى، Singulariteam نەگىزىن قالاۋشىلاردىڭ ءبىرى. Forbes جۋرنالىنىڭ «قازاقستاننىڭ ەڭ باي بيزنەسمەندەرىنىڭ توپ-50»، «قازاقستاننىڭ ەڭ ىقپالدى بيزنەسمەندەرىنىڭ توپ-50» تىزىمدەرىنە ەنگىزىلگەن.

سونىمەن قاتار، ول ۇقشۇ باس حاتشىسى يمانعالي تاسماعامبەتوۆتىڭ قىزى اسەل تاسماعامبەتوۆاعا ۇيلەنگەن.

"بايدەن بۇل ادامدارمەن نەمەسە ولاردىڭ وكىلدەرىمەن جەكە كەزدەسكەن" - دەيدى جەيمس كومەر (سۋرەتتە).

بۇدان بولەك، كومەر حانتەر بايدەن اكەسىنىڭ ىقپالىن پايدالانىپ، قازاقستان، رەسەي جانە ۋكرايناداعى وليگارحتاردان ميلليونداعان اقشا العانىن ايتادى.

بۇعان دەيىن، ءالى اقش پرەزيدەنتى بولعان كەزدە، ترامپ باق-تى «بايدەننىڭ سىبايلاس جەمقورلىققا قاتىسى بولۋى مۇمكىن ەكەنىن جاسىردى» دەپ ايىپتاعان ەدى. ول بايدەننىڭ ۇلى حانتەردىڭ شەتەلدەن تولەمدەر العانىن بىرنەشە رەت ايتقان.

20 ماۋسىم اقش پرەزيدەنتى دجو بايدەننىڭ ۇلى حانتەر بايدەن ءۇش فەدەرالدى قىلمىسقا بارعانىن مويىندادى.