شىعىس قازاقستاندا وسكەمەننىڭ تانتالى مەن نيوبيىنەن مەديسيناعا قاجەتتى قۇرالدار مەن جاساندى يمپلانتاتتار شىعارىپ، ءوندىرىستى تۇبەگەيلى جاڭعىرتىپ، يننوۆاسيالىق باعىتتا دامىتۋعا مۇمكىندىك بەرەتىن جوبا قولعا الىندى. شىعىسقازاقستاندىق عالىمدار بۇل ءىستى استاناداعى تراۆماتولوگيا جانە ورتوپەديا عىلىمي-زەرتتەۋ ينستيتۋتىنىڭ ماماندارىمەن بىرلەسىپ جۇزەگە اسىرۋدا. بۇل تۋرالى وبلىس اكىمى دانيال احمەتوۆ ءوڭىر تۇرعىندارى الدىنداعى ەسەپ بەرۋ كەزدەسۋىندە ءمالىم ەتتى.

وبلىستا مۇلدە جاڭا سيپاتتاعى، تەحنولوگيالىق سەرپىلىس اكەلەتىن جوبانىڭ ءبىرى – تانتال مەن نيوبييدەن مەديسينالىق يمپلانتات جاساۋ. بۇگىندە بۇل جوبانى د.سەرىكبايەۆ اتىنداعى شقمتۋ-دىڭ عىلىمي-زەرتتەۋ جانە تاجىريبەلىك-كونسترۋكتورلىق جۇمىس توبى ازىرلەۋدە.

وتكەن جىلى وبلىستا ەكى ميلليارد تەڭگەنىڭ سەگىز جوباسى بويىنشا عىلىمي-زەرتتەۋ جانە تاجىريبەلىك-كونسترۋكتورلىق  جۇمىس جۇرگىزىلدى.

وبلىستا مىرىش ءوندىرىسىن جاڭعىرتۋعا ماڭىز بەرىلىپ وتىر. سول ارقىلى وڭىردەگى جۇتاڭ كەن قازبالارىنان باعالى كومپونەنتتەر شىعارۋدى ارتتىرىپ، كەننىڭ ءاربىر مىڭ تونناسىنان 600 مىڭ اقش دوللارى مولشەرىندە تابىس تابۋدى قامتاماسىز ەتەد. «پيرومەتاللۋرگيالىق تاسىلمەن قورعاسىن مەن مىرىش ءوندىرىسىن الۋ» جوباسى ارقىلى ونەركاسىپتەگى ەنەرگيانىڭ جۇمسالۋىن 4-8 پايىزعا دەيىن ازايتۋعا بولادى. ال «تاۋ-كەن بايىتۋ وندىرىسىندە ۇنتاقتاۋ يننوۆاسيالىق تەحنولوگياسىن ەنگىزۋ» بويىنشا جۇمىستار ءوندىرىستىڭ وزىندىك قۇنىن 1،5-2 ازايتۋعا مۇمكىندىك بەرەدى.

– ەلباسىمىز نۇرسۇلتان نازاربايەۆ ەكونوميكانىڭ بارلىق سالاسىندا تۇراقتىلىقتى ساقتاپ، حالىقتىڭ ءال-اۋقاتىن كوتەرۋدى تاپسىرعان بولاتىن. بۇدان بولەك پرەزيدەنت بيىلعى جولداۋىندا الەمنىڭ دامىعان ەلدەرىنىڭ قاتارىنا قوسىلۋ ءۇشىن قازاق ەلى اتقارۋعا ءتيىستى 10 مىندەتتى ناقتىلاپ بەردى. جالپى، ءبىزدىڭ وبلىستا ەلباسى جولداۋىندا جۇكتەلگەن مىندەتتەر جۇزەگە اسىرىلىپ كەلەدى. سونىڭ ءبىرى – وبلىستاعى عىلىمي-زەرتتەۋ جانە تاجىريبەلىك-كونسترۋكتورلىق جۇمىس توبىنىڭ ازىرلەپ جاتقان جوباسى، – دەدى وبلىس اكىمى دانيال احمەتوۆ.