16 جاستاعى شەرزات بولاتتىڭ ولىمىنەن كەيىن جانە وعان ىلەسە بولعان وقيعالاردان سوڭ تالعار قالاسىندا ءبىرقاتار كادرلىق اۋىس-تۇيىستەر بولدى. اتاپ ايتقاندا، 15 قازاندا «ءوز مىندەتتەرىن تيىسىنشە ورىنداماعانى ءۇشىن» قالا اكىمى باقىت كۇرىشبەكوۆ پەن ونىڭ ورىنباسارى ماتان ساعىندىق قىزمەتتەرىنەن بوساتىلدى. ەكى ايدان كەيىن، 15 جەلتوقساندا جاڭا اكىمدى سايلاۋ ءوتتى. سايلاۋدا تالعار اۋداندىق ءماسليحاتىنىڭ دەپۋتاتى، «Amanat» پارتياسىنىڭ وكىلى جانە «تالعار تۇرعىن ءۇي» ءجشس-نىڭ باس ديرەكتورى ارىستانبەك ءابىلقايىر ۇلى جەڭىسكە جەتتى. ول ءۇشىن سايلاۋشىلاردىڭ 70،5%-ى داۋىس بەردى. جاڭا اكىم مەن ونىڭ جۇبايىنىڭ بيزنەستەرى تۋرالى نە بەلگىلى؟
Shishkin like تەلەگرام ارناسىنىڭ مالىمەتىنشە، بۇل تالعارداعى ءۇشىنشى اكىم سايلاۋى. الدىڭعى قالا اكىمى باقىت كۇرىشبەكوۆ 2022 جىلعى 12 ماۋسىمدا سايلانعان بولاتىن، وعان دەيىن ول «امانات» پارتياسىنىڭ تالعار اۋداندىق فيليالىنىڭ اتقارۋشى حاتشىسى قىزمەتىن اتقاردى جانە ءدال وسى پارتيا ونىڭ كانديداتۋراسىن ۇسىنعان ەدى. وعان دەيىن تالعار اكىمى بولىپ 2021 جىلعى 31 قازاندا ءۇش شاقىرىلىم بويى تالعار اۋداندىق ءماسليحاتىنىڭ دەپۋتاتى جانە حيرۋرگ-دارىگەر قايرات يسابايەۆ سايلانعان. ول 2022 جىلعى 5 ساۋىردە ءوز ەركىمەن قىزمەتىنەن كەتۋ تۋرالى ءوتىنىش جازىپ، اكىمدىك كرەسلوسىنان كەتتى.
سايلاۋ كوميسسياسىنىڭ مالىمەتىنشە، بۇل سايلاۋدا سايلاۋشىلاردىڭ قاتىسۋ دەڭگەيى 30،1%-دى قۇرادى. بۇل 42 774 سايلاۋشىنىڭ ىشىنەن 12 875 ادام. كەيبىر قوعام بەلسەندىلەرىنىڭ ايتۋىنشا، الدىڭعى سايلاۋلارداعىداي، قاتىسۋشىلاردىڭ سانى شامادان تىس كورسەتىلگەن.
«امانات» پارتياسىنىڭ وكىلى، تالعار اۋداندىق ءماسليحاتىنىڭ دەپۋتاتى جانە «تالعار تۇرعىن ءۇي» ج ش س باس ديرەكتورى ارىستانبەك ءابىلقايىر ۇلى 70،5% داۋىسپەن جەڭىسكە جەتتى. ونىڭ قارسىلاستارىنىڭ ءبىرى «حالىق پارتياسىنىڭ» كانديداتى جانىبەك قادەنوۆ 14،6%، ال ءوزىن-وزى ۇسىنعان بەساعاش اۋىلدىق وكرۋگى اكىمىنىڭ ورىنباسارى الىبەك رامازانوۆ 8،9% داۋىس جينادى. «بارلىعىنا قارسى» 1،4% سايلاۋشى داۋىس بەردى.
ارىستانبەك ءابىلقايىرۇلىن ءبارى تانيدى.
تالعاردىڭ جاڭا اكىمى 1983 جىلى الماتى وبلىسىندا دۇنيەگە كەلگەن. ول الماتى اگرارلىق كوللەدجىن ءتامامداعان، ماماندىعى – ەكولوگ. سايلاۋالدى ۇگىت ماتەريالدارىندا كورسەتىلگەندەي، ەڭبەك جولىن 2005-2006 جىلدارى «MAG Group» قۇرىلىس كومپانياسىندا باستاعان. 2006-2009 جىلدارى مەملەكەتتىك تاجىريبەلىك شارۋاشىلىقتا ديرەكتوردىڭ كومەكشىسى بولىپ جۇمىس ىستەپ، كەيىن «پك مارات» جشس-نە دامۋ جونىندەگى مەنەدجەر رەتىندە اۋىسقان. كومپانيا 2017 جىلى تالعاردا تىركەلگەن، ءقاۋىپسىز قالدىقتاردى جيناۋمەن اينالىسادى جانە حامزا سۇلەيمەنوۆكە تيەسىلى.
وسى كومپانيادا جۇمىس ىستەۋىنىڭ ارقاسىندا ارىستانبەك ءابىلقايىر ۇلى قالا تۇرعىندارى مەن جەرگىلىكتى قوعام بەلسەندىلەرىنىڭ اراسىندا تانىمال بولدى. «پك مارات» – تالعاردا قوقىس شىعارۋ قىزمەتىن كورسەتەتىن جالعىز كومپانيا. قالاداعى قوقىس كونتەينەرلەرىنىڭ تولىپ كەتۋى نەمەسە رۇقساتسىز قوقىس ورىندارى ماسەلەلەرىن شەشۋ ءۇشىن تۇرعىندار وعان مەسسەندجەر ارقىلى فوتو مەن مەكەنجاي جىبەرەتىن. ول تۇرعىندارمەن كەزدەسۋلەردە كومپانيا اتىنان شىعىپ، ەكولوگيالىق اكسيالار مەن سەنبىلىكتەرگە بەلسەندى قاتىسقان.
Adata.kz دەرەكتەرىنە سايكەس، 2023 جىلعى 10 ناۋرىزدا ارىستانبەك ءابىلقايىر ۇلى «تالعار تۇرعىن ءۇي» ءجشس-نىڭ باس ديرەكتورى بولىپ تاعايىندالعان. بۇل باستاپقىدا جىلۋ ەنەرگياسىن جەتكىزۋشى بولعان كۆازيمەملەكەتتىك كومپانيا. بۇگىندە ونىڭ قىزمەت ءتۇرى – تۇرعىن ءۇي قۇرىلىسى.
2023 جىلعى 19 ناۋرىزدا ءابىلقايىر ۇلى «امانات» پارتياسى اتىنان تالعار اۋداندىق ءماسليحاتىنىڭ دەپۋتاتى بولىپ سايلاندى. ونىڭ سايلاۋالدى ناۋقانى كەزىندە پارتيالىق رەسۋرستار بەلسەندى قولدانىلدى.
جاڭا اكىمنىڭ جانە ونىڭ جۇبايىنىڭ بيزنەسى.
Adata.kz مالىمەتتەرىنە سۇيەنسەك، 2020 جىلى ءابىلقايىر ۇلى جاركەنتتە جەكە كاسىپكەر رەتىندە تىركەلىپ، ءقاۋىپسىز قالدىقتاردى جيناۋ جانە تازالاۋ قىزمەتتەرىمەن اينالىسقان. الايدا سايلاۋعا از ۋاقىت قالعاندا، 2024 جىلعى 24 قاراشادا ونىڭ «جاركەنت تازالىق» جك ەسەپتەن شىعارىلعان. وسى ۋاقىت ىشىندە بولاشاق تالعار اكىمى 212 405 تەڭگە سالىق تولەگەن.
ونىڭ جۇبايى ايجان بايۇزاقوۆا، Adata.kz دەرەكتەرى بويىنشا، اناعۇرلىم تابىستى كاسىپكەر. 2019 جىلدان بەرى وعان «سان-اي سەرۆيس» جك تيەسىلى، ول دا تازالاۋ قىزمەتتەرىمەن، سونداي-اق كوتەرمە جانە بولشەك ساۋدامەن اينالىسادى. تولەنگەن سالىق سوماسى – 3 ملن تەڭگەدەن اسادى. سالىق اۋدارىمدارىنىڭ كۇرت ءوسۋى 2022 جىلى بايقالعان، سول كەزدە جك بيۋدجەتكە شامامەن 2 ملن تەڭگە تولەگەن.
اكىمنىڭ جۇبايى مەملەكەتتىك ساتىپ الۋلارعا قاتىسۋشى: ونىڭ كاسىپورنىندا جالپى سوماسى 53 ملن تەڭگە بولاتىن 59 كەلىسىمشارت بار. ەڭ ءىرى تاپسىرىس بەرۋشى – تالعار اكىمدىگى. 2020-2024 جىلدارى قالا بيلىگى «سان-اي سەرۆيس» جك-دەن 34،6 ملن تەڭگەگە قىزمەتتەر ساتىپ العان. سونداي-اق تاپسىرىس بەرۋشىلەر قاتارىندا تالعار اۋدانىنداعى كەندالىن، الاتاۋ، نۇرىن اۋىلدىق وكرۋگتەرىنىڭ اكىمدىكتەرى بار.
سونىمەن قاتار، «سان-اي سەرۆيس» جك «قتج» فيليالدارىنا قىزمەت كورسەتكەن. اشىق دەرەككوزدەرگە سايكەس، 2019 جىلى ۇلتتىق كومپانيا كاسىپكەرگە سوتقا جۇگىنىپ، «نۇرلى جول» تەمىرجول ۆوكزالىندا 66 اۆتوتۇراق ورنى مەن بولمە جالداعانى ءۇشىن 3،65 ملن تەڭگە قارىزىن ءوندىرىپ العان.
