16 jastaǵy Sherzat Bolattyń óliminen keiin jáne oǵan ilese bolǵan oqiǵalardan soń Talǵar qalasynda birqatar kadrlyq aýys-túiister boldy. Atap aitqanda, 15 qazanda «óz mindetterin tiisinshe oryndamaǵany úshin» qala ákimi Baqyt Kúrishbekov pen onyń orynbasary Matan Saǵyndyq qyzmetterinen bosatyldy. Eki aidan keiin, 15 jeltoqsanda jańa ákimdi sailaý ótti. Sailaýda Talǵar aýdandyq máslihatynyń depýtaty, «Amanat» partiiasynyń ókili jáne «Talǵar Turǵyn Úi» JShS-niń bas direktory Arystanbek Ábilqaiyruly jeńiske jetti. Ol úshin sailaýshylardyń 70,5%-y daýys berdi. Jańa ákim men onyń jubaiynyń biznesteri týraly ne belgili?
Shishkin like telegram arnasynyń málimetinshe, bul Talǵardaǵy úshinshi ákim sailaýy. Aldyńǵy qala ákimi Baqyt Kúrishbekov 2022 jylǵy 12 maýsymda sailanǵan bolatyn, oǵan deiin ol «Amanat» partiiasynyń Talǵar aýdandyq filialynyń atqarýshy hatshysy qyzmetin atqardy jáne dál osy partiia onyń kandidatýrasyn usynǵan edi. Oǵan deiin Talǵar ákimi bolyp 2021 jylǵy 31 qazanda úsh shaqyrylym boiy Talǵar aýdandyq máslihatynyń depýtaty jáne hirýrg-dáriger Qairat Isabaev sailanǵan. Ol 2022 jylǵy 5 sáýirde óz erkimen qyzmetinen ketý týraly ótinish jazyp, ákimdik kreslosynan ketti.
Sailaý komissiiasynyń málimetinshe, bul sailaýda sailaýshylardyń qatysý deńgeii 30,1%-dy qurady. Bul 42 774 sailaýshynyń ishinen 12 875 adam. Keibir qoǵam belsendileriniń aitýynsha, aldyńǵy sailaýlardaǵydai, qatysýshylardyń sany shamadan tys kórsetilgen.
«Amanat» partiiasynyń ókili, Talǵar aýdandyq máslihatynyń depýtaty jáne «Talǵar Turǵyn Úi» JShS bas direktory Arystanbek Ábilqaiyruly 70,5% daýyspen jeńiske jetti. Onyń qarsylastarynyń biri «Halyq partiiasynyń» kandidaty Jánibek Qadenov 14,6%, al ózin-ózi usynǵan Besaǵash aýyldyq okrýgi ákiminiń orynbasary Álibek Ramazanov 8,9% daýys jinady. «Barlyǵyna qarsy» 1,4% sailaýshy daýys berdi.
Arystanbek Ábilqaiyrulyn bári tanidy.
Talǵardyń jańa ákimi 1983 jyly Almaty oblysynda dúniege kelgen. Ol Almaty agrarlyq kolledjin támamdaǵan, mamandyǵy – ekolog. Sailaýaldy úgit materialdarynda kórsetilgendei, eńbek jolyn 2005-2006 jyldary «MAG Group» qurylys kompaniiasynda bastaǵan. 2006-2009 jyldary Memlekettik tájiribelik sharýashylyqta direktordyń kómekshisi bolyp jumys istep, keiin «PK Marat» JShS-ne damý jónindegi menedjer retinde aýysqan. Kompaniia 2017 jyly Talǵarda tirkelgen, qaýipsiz qaldyqtardy jinaýmen ainalysady jáne Hamza Súleimenovke tiesili.
Osy kompaniiada jumys isteýiniń arqasynda Arystanbek Ábilqaiyruly qala turǵyndary men jergilikti qoǵam belsendileriniń arasynda tanymal boldy. «PK Marat» – Talǵarda qoqys shyǵarý qyzmetin kórsetetin jalǵyz kompaniia. Qaladaǵy qoqys konteinerleriniń tolyp ketýi nemese ruqsatsyz qoqys oryndary máselelerin sheshý úshin turǵyndar oǵan messendjer arqyly foto men mekenjai jiberetin. Ol turǵyndarmen kezdesýlerde kompaniia atynan shyǵyp, ekologiialyq aktsiialar men senbilikterge belsendi qatysqan.
Adata.kz derekterine sáikes, 2023 jylǵy 10 naýryzda Arystanbek Ábilqaiyruly «Talǵar Turǵyn Úi» JShS-niń bas direktory bolyp taǵaiyndalǵan. Bul bastapqyda jylý energiiasyn jetkizýshi bolǵan kvazimemlekettik kompaniia. Búginde onyń qyzmet túri – turǵyn úi qurylysy.
2023 jylǵy 19 naýryzda Ábilqaiyruly «Amanat» partiiasy atynan Talǵar aýdandyq máslihatynyń depýtaty bolyp sailandy. Onyń sailaýaldy naýqany kezinde partiialyq resýrstar belsendi qoldanyldy.
Jańa ákimniń jáne onyń jubaiynyń biznesi.
Adata.kz málimetterine súiensek, 2020 jyly Ábilqaiyruly Jarkentte jeke kásipker retinde tirkelip, qaýipsiz qaldyqtardy jinaý jáne tazalaý qyzmetterimen ainalysqan. Alaida sailaýǵa az ýaqyt qalǵanda, 2024 jylǵy 24 qarashada onyń «Jarkent Tazalyq» JK esepten shyǵarylǵan. Osy ýaqyt ishinde bolashaq Talǵar ákimi 212 405 teńge salyq tólegen.
Onyń jubaiy Aijan Baiuzaqova, Adata.kz derekteri boiynsha, anaǵurlym tabysty kásipker. 2019 jyldan beri oǵan «San-Ai Servis» JK tiesili, ol da tazalaý qyzmetterimen, sondai-aq kóterme jáne bólshek saýdamen ainalysady. Tólengen salyq somasy – 3 mln teńgeden asady. Salyq aýdarymdarynyń kúrt ósýi 2022 jyly baiqalǵan, sol kezde JK biýdjetke shamamen 2 mln teńge tólegen.
Ákimniń jubaiy memlekettik satyp alýlarǵa qatysýshy: onyń kásipornynda jalpy somasy 53 mln teńge bolatyn 59 kelisimshart bar. Eń iri tapsyrys berýshi – Talǵar ákimdigi. 2020-2024 jyldary qala biligi «San-Ai Servis» JK-den 34,6 mln teńgege qyzmetter satyp alǵan. Sondai-aq tapsyrys berýshiler qatarynda Talǵar aýdanyndaǵy Kendálin, Alataý, Nuryn aýyldyq okrýgteriniń ákimdikteri bar.
Sonymen qatar, «San-Ai Servis» JK «QTJ» filialdaryna qyzmet kórsetken. Ashyq derekkózderge sáikes, 2019 jyly ulttyq kompaniia kásipkerge sotqa júginip, «Nurly jol» temirjol vokzalynda 66 avtoturaq orny men bólme jaldaǵany úshin 3,65 mln teńge qaryzyn óndirip alǵan.
