تالعا شۇبەرەك بايلاپ، تۇمار تاعاتىندار اداسپاڭدار! (فوتو)

Dalanews 03 قار. 2016 05:55 587

بەلگىلى ايتىسكەر بالعىنبەك يماشيەۆ ءوزىنىڭ Instagram پاراقشاسىندا قازاقتاردىڭ ارۋاقتارعا زيارات ەتۋ، تۇمار تاعۋ، تالعا قىزىل شۇبەرەك بايلاۋ، تىل-كوزدەن ساقتانۋ ءۇشىن مونشاق تاعۋ سەكىلدى ادەتتەرىن سىنعا الدى.

بۇل تۋرالى nur.kz حابارلايدى.

اقىننىڭ ويىنشا، بۇل ادەتتەر شايتاننىڭ ادامداردى جاراتۋشىسىنان ايىرۋى دەپ سانالادى.
 «ادام ادىلەتسىز. ول جوق بولدى ەمەس پە، كەيىن اللا ونى تامشى قىلدى، كەيىن وعان دەنە مۇشەلەرىن بەردى. ءاربىر مۇشەنى ءبولىپ ايتپاعاندا، ءوزى سوعان ويلانسا، راسىندا ادامنىڭ قۇرىلىسى عاجايىپ ەكەنىن كورەدى. ول جاتىردا بولعاندا، ونى كىندىك ارقىلى تاماقتاندىردى، كەيىن تۋىلىپ، كىندىك شەگى ۇزىلگەندە، ول ءۇشىن اناسىنىڭ كەۋدەسىن سۇتكە تولتىردى، وعان ەمۋدى ۇيرەتتى، كەيىن ونى كەۋدەدەن ايىرعاندا، وعان ءتىس بەردى، كۇش بەردى، اسپاننان جاڭبىر جاۋدىرىپ، جەردەن ءارتۇرلى جەمىس-جيدەكتەر، وسىمدىكتەر ءوسىردى. سويسا ازىق، ءارى كيىم، مىنسە كولىك بولاتىن مال-جانۋارلار جاراتتى.

ءبىراق ول تاككاپپار، ءوزى تۋىلىپ، ءوزى وسىعان جەتكەندەي قۇدايىن مويىندامايدى، وعان سەرىك قوسادى، ءولىپ قالعان ادامداردىڭ ريزالىعىن ىزدەپ، قۇدايى تۇرعاندا ولاردان كەرەگىن سۇرايدى. انشەيىن قاعازدان، بىلعارى تەرىدەن تۇراتىن تۇمارعا سەنەدى، كوك تۇسكە بويالعان اينەككە كوزدەن ساقتايدى دەپ سەنەدى، جاي ءوسىپ تۇرعان تالعا شۇبەرەك بايلاپ، وعان ءۇمىت ەتەدى، ماحاباتى بەرىك بولادى دەپ كوپىرگە قۇلىپ ءىلىپ، كىلتىن سۋعا تاستايدى. بۇل جاي ءىس ەمەس، بۇل شايتاننىڭ ادامداردى جاراتۋشىسىنان ايىرۋى. كۇنى بويى ساعاتىن جۇمىسقا، ويىن-كۇلكىگە، تاماق ءىشۋ مەن ءىش بوساتۋعا جۇمساپ، سونداي كەرەكتى ىستەرگە ۋاقىت تاۋىپ، جاراتقانىنا بەس مينۋتىن بولگىسى كەلمەيدى، ول جايلى اڭگىمەنى جاقتىرمايدى. اللا سىزگە كەرەك ەمەس؟ اتا-اناسىمەن وسىلاي جاساسا ول كىم بولار ەدى؟ راسىندا، ادام ادىلەتسىز. ءبىراق قۇدايىنا قايتاتىن كۇن الىس ەمەس، ءارى ول ءار نارسەنى كورۋشى، ءبىلۋشى»، — دەپ جازادى ايتىسكەر.

بۇل پىكىر، ادەتتەگىدەي، جەلى قولدانۋشىلارىنىڭ اراسىندا قىزۋ پىكىرتالاس تۋعىزدى.

6

ۇسىنىلعان
سوڭعى جاڭالىقتار