جيىنعا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ كاسىبي باعىتتاعى تىلدەر كافەدراسىنىڭ مەڭگەرۋشىسى، فيلولوگيا عىلىمدارىنىڭ دوكتورى، پروفەسسور جۇماعالي ءابۋوۆ، ا. بايتۇرسىن ۇلى اتىنداعى ءتىل ءبىلىمى ينستيتۋتى ءتىل مادەنيەتى ءبولىمىنىڭ مەڭگەرۋشىسى، فيلولوگيا عىلىمدارىنىڭ كانديداتى ءنازيرا ءامىرجانوۆا، ا.بايتۇرسىن ۇلى اتىنداعى ءتىل ءبىلىمى ينستيتۋتى تەرمينولوگيا ءبولىمىنىڭ مەڭگەرۋشىسى، فيلولوگيا عىلىمدارىنىڭ كانديداتى، دوسەنت سارسەنباي قۇلمانوۆ، سونىمەن قاتار زيالى قاۋىم وكىلدەرى مەن تىلگە جاۋاپتى ماماندار قاتىستى.
باسقوسۋدا بايانداما جاساعان عالىمدار لاتىن الىپبيىنە كوشۋگە قاتىستى ويلارىمەن ءبولىستى.
ولار لاتىن الىپبيىنە كوشۋ – ۇلتتىق مۇددەنى قورعاۋدىڭ باستى تەتىگى ەكەندىگىن ايتتى.
ءوز سوزىندە ا.بايتۇرسىن ۇلى اتىنداعى ءتىل ءبىلىمى ينستيتۋتى ءتىل مادەنيەتى ءبولىمىنىڭ مەڭگەرۋشىسى، فيلولوگيا عىلىمدارىنىڭ كانديداتى ءنازيرا ءامىرجانوۆا ەڭ باستىسى تۇركيا، وزبەكستان، ءازىربايجان، تۇركمەنستان سياقتى تۇركىتىلدەس ەلدەردىڭ تاجىريبەسىنە سۇيەنە وتىرىپ، ۇلكەن دايىندىق جۇمىستارىن جۇرگىزۋ كەرەكتىگىن تىلگە تيەك ەتتى. سونداي-اق، ءالىپبي جاساۋدىڭ بىرنەشە كريتەريلەرىن اتادى.
– ءالىپبيدى جاساۋدا ەڭ الدىمەن بالاعا كوزشالىم جانە قولشالىمعا وڭتايلى بولۋى كەرەك. ءالىپبيدى ەرەسەك ادامدار ءۇشىن ەمەس، 6-7 جاستاعى بالانى ويلاپ جاساۋىمىز قاجەت. ەگەر كوزشالىم مەن قولشالىمعا وڭتايلى بولسا، بۇل كەرەمەت جازۋ بولادى»، – دەگەن فيلولوگيا عىلىمدارىنىڭ كانديداتى ءنازيرا سەرىك قىزى ءوز سوزىندە ءبىر ءارىپ – ءبىر دىبىس ءپرينسيپىنىڭ قاتاڭ ساقتالۋى تۋرالى دا كەڭىنەن اڭگىمەلەدى.
جيىنعا قاتىسۋشىلار بايانداماشىلارعا لاتىن الىپبيىنە كوشۋگە بايلانىستى سۇراقتارىن قويىپ، ناقتى جاۋاپتارىن الدى.
