تالدىقورعاندا جاڭا فورماتتاعى ءۇشىنشى دۇكەن اشىلدى. بۇل الدىڭعىلارعا قاراعاندا الدەقايدا كەڭ ءارى جايلى ساۋدا ورنى، مۇندا الەۋمەتتىك ماڭىزى بار تاۋارلار 15-20% تومەن باعادا ۇسىنىلادى، – دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

حالىققا پايداسى مول بۇل ساۋدا نىسانى "جەتىسۋ" اكك" ءودي" اق-نىڭ قولداۋىمەن  "سۆەت-كو" جك-مەن بىرلەسىپ اشىلدى. مۇندا وبلىستىڭ تۇراقتاندىرۋ قورىنىڭ جانە "كەرى سحەمامەن" جۇمىس ىستەيتىن وندىرۋشىلەردىڭ تاۋارلارى ساۋدالانادى.

بۇل دۇكەندە تاۋارلاردىڭ ءتۇرى كوپ، سونىڭ ىشىندە ازىق-تۇلىك، تۇرمىستىق حيميا، سۋسىندار جانە باسقا دا الەۋمەتتىك ماڭىزى بار 18 ءتۇرلى ازىق-تۇلىك ونىمدەرى نارىقتاعىدان 15-20% تومەن باعادا ساۋدالانادى. مىسالى، I ساناتتاعى جۇمىرتقانىڭ وندىعى 445 تەڭگەدەن، سۇيىق ماي 510 تگ/ل، كۇرىش – 340 تگ/كگ، كارتوپ – 110 تگ/كگ، پياز – 70 تگ/كگ، ءسابىز – 140 تگ/كگ جانە ت.ب.

نىساننىڭ اشىلۋىندا ءسوز سويلەگەن تالدىقورعان قالاسى اكىمىنىڭ ورىنباسارى رۇستەم بەرشىمبەكوۆ الەۋمەتتىك دۇكەندەردىڭ اشىلۋى وبلىس اكىمدىگىنىڭ باستاماسىمەن، تالدىقورعان قالاسى اكىمدىگى مەن "جەتىسۋ" الەۋمەتتىك-كاسىپكەرلىك كورپوراسيانىڭ بىرلەسىپ قولعا العان شاراسى ەكەنىن اتاپ ءوتتى.

– مۇنداعى سورەلەرگە تاۋارلار دەلدالسىز، وندىرۋشىلەردەن قوسىمشا شىعىنسىز تىكەلەي جەتكىزىلەدى. بۇل دۇكەندەردىڭ ءبارى اكك-نىڭ قارجىلاندىرۋىندا، سوندىقتان بۇل ولاردىڭ تاۋارلاردى نارىقتاعىدان تومەن باعادا ساتۋىنا مۇمكىندىك بەرەدى، – دەدى ر. بەرشىمبەكوۆ.

وسى دۇكەندەردىڭ جۇمىسىنا قاتىستى ساتىپ الۋشىلار دا ءوز پىكىرىن ءبىلدىردى:

– مۇندا جارما، كوكونىستەر مەن جۇمىرتقا الۋعا كەلدىم. شىنىندا دا نارىقتاعىدان تومەن باعادا ەكەن.  دۇكەن قولايلى جەردە، ايالداماعا جاقىن ورنالاسقان. ءبىزدىڭ اۋداندا ەگدە جاستاعىلار كوپ تۇرادى. ەندى بىزگە ورتالىق بازارعا ءجيى بارۋدىڭ قاجەتى بولمايدى، – دەدى گۇلگۇل قاناپيانوۆا.

جالپى قازىرگى كەزدە جەتىسۋ وبلىسىندا "جەتىسۋ" اكك-نىڭ 6 الەۋمەتتىك نۇكتەسى بار، ونىڭ ىشىندە 2 الەۋمەتتىك دۇكەن تالدىقورعاندا، 1-ەۋى ۇشتوبە قالاسىندا، سول سياقتى كوممۋنالدىق جانە الەۋمەتتىك بازارلار مەن "كوكبازار" ساۋدا ۇيىندە ساۋدا نۇكتەلەرى جۇمىس ىستەيدى. اكك وكىلدەرىنىڭ ايتۋىنشا، جۇمىس مۇنىمەن توقتالمايدى، وبلىس اكىمىنىڭ تاپسىرماسىنا سايكەس بۇدان ءارى دە وبلىس ورتالىعىنىڭ حالىق تىعىز ورنالاسقان شاعىن اۋداندارىندا وسىنداي فورماتتاعى الەۋمەتتىك دۇكەندەر اشىلاتىن بولادى.

اتاپ وتسەك، "جارىق" الەۋمەتتىك جاڭا دۇكەنى "سامال" شاعىن اۋدانىندا ورنالاسقان.