2018 جىلدىڭ تامىز ايىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باستاماسىمەن، يۋنەسكو «EDTECH-KZ» حالىقارالىق ءبىلىم بەرۋ ورتالىعىنىڭ قولداۋىمەن «ءبىلىم بەرۋ اليانسى» كونسورسيۋمى قۇرىلىپ، ونىڭ قۇرامىنا وبلىستار مەن استانا، الماتى، شىمكەنت قالالارىنىڭ ءبىلىم بەرۋ باسقارمالارى كىرگەن بولاتىن. كونسورسيۋمنىڭ ماقساتى – قازاقستاندا پەداگوگيكالىق جوعارى وقۋ ورىندارىندا باسەكەگە قابىلەتتىلىگىن ارتتىۋ، زاماناۋي قوعام تالابىنا ساي كادرلار دايارلاۋ ۇردىستەرىن ۇيلەستىرۋ بولىپ تابىلادى.
رەكتور تاكير بالىقبايەۆ ءوز سوزىندە «ءبىلىم بەرۋ اليانسى» كونسورسيۋمى مۇشەلەرىن الداعى اتقارىلاتىن مىندەتتەرمەن تانىستىرىپ، تالقىلاناتىن ماسەلەلەردىڭ ماڭىزدىلىعىن اتاپ ءوتتى.
– بۇل باسقوسۋ الاڭىندا قازىرگى ءبىلىم بەرۋ جۇيەسىندەگى وزەكتى ماسەلەلەر مەن پەداگوگيكالىق كادرلاردى دايارلاۋ جانە كاسىبي بىلىكتىلىكتى ارتتىرۋ جاعدايىن تالقىلاۋىمىز قاجەت. ءبىز كۇش-جىگەرىمىزدى بىرىكتىرە وتىرىپ، ءبىلىم بەرۋدەگى ەڭ ماڭىزدى ماسەلەلەردى شەشۋگە ءتيىسپىز، – دەدى.
ءىس-شارا بارىسىندا تاكير بالىقبايەۆ، عاني بەيسەمبايەۆ، فينليانديادان كەلگەن حالىقارالىق ساراپشىلار – يوۋني ۆاليارۆي، يااككو سكانتسي، ەلينا حاريۋ، لينا بەنەتتە، قاراعاندى وبلىسى ءبىلىم باسقارماسىنىڭ باسشىسىنىڭ كەڭەسشىسى ءسابيت قونتايەۆ، قازۇپۋ رەكتورى گاۋحار الدامبەرگەنوۆا، «EDTECH-KZ» حببو «KASIP» جوباسىنىڭ جەتەكشىسى سابينا ياحياروۆا بايانداما جاسادى.
تاكير بالىقبايەۆ ءوز بايانداماسىندا قازاقستاننىڭ ءبىلىم بەرۋ مەكەمەلەرىندەگى زامان تالابىنا ساي باسەكەگە قابىلەتتى پەداگوگيكالىق كادرلاردى دايارلاۋ ماسەلەلەرى تۋرالى كەڭىنەن اڭگىمەلەپ بەردى.
– پەداگوگيكالىق ءبىلىمدى دامىتۋ ءۇشىن بولاشاق مۇعالىمدەردىڭ ادىستەمەلىك دايىندىق مازمۇنىن وزگەرتۋ قاجەت. بۇل باعىتتاعى ۇلكەن وزگەرىستەر ءقازىردىڭ وزىندە ءجۇرىپ جاتىر. قازۇپۋ وقىتۋشىلارى «نازاربايەۆ زياتكەرلىك» مەكتەبىندە مەكتەپ پاندەرىنىڭ جاڭا مازمۇنى بويىنشا بىلىكتىلىگىن ارتتىرۋدان وتۋدە. 2018 جىلى 32 ءمۇعالىم بىلىكتىلىگىن ارتتىردى. 2018 جىلدىڭ جەلتوقسان ايىندا ءبىتىرۋشى كۋرستاردىڭ 455 ستۋدەنتى جاڭا ءبىلىم مازمۇنىن ەنگىزۋ ادىستەمەسىنە ۇيرەندى. ءساۋىر ايىندا مەكتەپ پاندەرىنىڭ جاڭارتىلعان مازمۇنى بويىنشا پروفەسسور-وقىتۋشىلار قۇرامىنا مەكتەپتەردە تاجىريبە ۇيىمداستىرىلادى. مەملەكەت قوعامداعى پەداگوگتاردىڭ ەرەكشە مارتەبەسىن مويىندايدى جانە جوعارى ساپالى كاسىبي قىزمەتتى جۇزەگە اسىرۋ ءۇشىن جاعداي جاساۋدى كوزدەپ وتىر. بۇل ءۇشىن جالاقىنى كوتەرۋ، ءمۇعالىمنىڭ قۇقىقتارى مەن مىندەتتەرىنەن باسقا، ءمۇعالىمنىڭ ار-نامىسى مەن قادىر-قاسيەتىن قۇرمەتتەۋ، كاسىبي ەتيكانى ساقتاۋ، توزىمدىلىك، ادامگەرشىلىك قاسيەتتەر تۋرالى ارنايى باپتار ەنگىزىلگەن «ق ر پەداگوگ مارتەبەسى تۋرالى» زاڭىن ازىرلەۋ جانە قابىلداۋ اسا ماڭىزدى. ءبىلىم بەرۋ ماسەلەلەرىن تالقىلاۋ كەزىندە مەكتەپ ديرەكتورلارى پراكتيكاعا 3-4 كۋرس ستۋدەنتتەرىن قابىلداۋعا نيەت ءبىلدىردى. «ءبىلىم بەرۋ اليانسىنىڭ» شەشىمى بويىنشا پەداگوگيكالىق جوعارى وقۋ ورىندارى مەن ءبىلىم بەرۋ باسقارمالارى KASIP TECT كاسىبي دياگنوستيكاسىن قولدانۋ ارقىلى پەداگوگ ماماندىعىنا بەيىمدىلىگى بار 9-سىنىپ وقۋشىلارىنىڭ سانىنان انىقتاۋعا ءتيىس. مەكتەپ بىتىرۋشىلەردى جوعارى وقۋ ورىندارىنا ايماقتىق ءبىلىم بەرۋ ورگاندارىنىڭ ءوتىنىشى بويىنشا تولەمسىز نەمەسە بيۋدجەتتەن تىس نەگىزدە – دەمەۋشىلەر ارقىلى جىبەرۋى مۇمكىن. بۇل قادامدار ءمۇعالىم رەتىندە جۇمىس جاساۋعا بەيىم دارىندى جاستاردى تاڭداۋعا مۇمكىندىك بەرەدى، – دەپ رەكتور كوكەيگە تۇيگەن ويلارىن ورتاعا سالدى.
كەزدەسۋ بارىسىندا فينلياندياداعى مەكتەپ جانە ۋنيۆەرسيتەت جۇيەلەرىنىڭ ەرەكشەلىكتەرى، مۇعالىمدەردى وقىتۋ، مۇعالىمدەردىڭ بىلىكتىلىگىن ارتتىرۋ، وقىتۋ تاجىريبەسىن ۇيىمداستىرۋ جانە وتكىزۋ، تاجىريبە الماسۋ ماسەلەلەرى تالقىلاندى. ءارى قاراي كونسورسيۋمى مۇشەلەرىنىڭ بىرلەسكەن ءىس-شارالاردىڭ تۇراقتى جانە ءتيىمدى، ناتيجەلى جۇمىس جاساۋىنا باعىتتالعان الداعى ءۇش جىلعا «ءبىلىم بەرۋ اليانسى» جۇمىس باعدارلاماسى ايقىندالدى.
عاني بەيسەمبايەۆ باسقوسۋعا قاتىسۋشىلاردى ءبىراۋىزدان قابىلدانعان جانە ماقۇلدانعان «ءبىلىم بەرۋ اليانسى» ازىرلەگەن «2021 جىلعا ارنالعان پەداگوگيكالىق كادرلاردى دايارلاۋ جول كارتاسى» باعدارلاماسىمەن تانىستىردى.
ءىس-شارا سوڭىندا ۋنيۆەرسيتەت رەكتورى تاكير بالىقبايەۆ شەتەلدىك قوناقتارعا جانە بارلىق قاتىسۋشىلارعا پەداگوگيكالىق ءبىلىم بەرۋدىڭ وزەكتى ماسەلەلەرىن تالقىلاۋدا اتسالىسقاندارى ءۇشىن العىس ايتتى.
اباي اتىنداعى قازۇپۋ، قوعاممەن بايلانىس ءبولىمى
