2018 jyldyń tamyz aiynda Abai atyndaǵy Qazaq ulttyq pedagogikalyq ýniversitetiniń bastamasymen, IýNESKO «EDTECH-KZ» Halyqaralyq bilim berý ortalyǵynyń qoldaýymen «Bilim berý Aliansy» Konsortsiýmy qurylyp, onyń quramyna oblystar men Astana, Almaty, Shymkent qalalarynyń bilim berý basqarmalary kirgen bolatyn. Konsortsiýmnyń maqsaty – Qazaqstanda pedagogikalyq joǵary oqý oryndarynda básekege qabilettiligin arttyý, zamanaýi qoǵam talabyna sai kadrlar daiarlaý úrdisterin úilestirý bolyp tabylady.
Rektor Takir Balyqbaev óz sózinde «Bilim berý Aliansy» Konsortsiýmy múshelerin aldaǵy atqarylatyn mindettermen tanystyryp, talqylanatyn máselelerdiń mańyzdylyǵyn atap ótti.
– Bul basqosý alańynda qazirgi bilim berý júiesindegi ózekti máseleler men pedagogikalyq kadrlardy daiarlaý jáne kásibi biliktilikti arttyrý jaǵdaiyn talqylaýymyz qajet. Biz kúsh-jigerimizdi biriktire otyryp, bilim berýdegi eń mańyzdy máselelerdi sheshýge tiispiz, – dedi.
Is-shara barysynda Takir Balyqbaev, Ǵani Beisembaev, Finliandiiadan kelgen halyqaralyq sarapshylar – Ioýni Valiiarvi, Iaakko Skantsi, Elina Hariý, Lina Benette, Qaraǵandy oblysy bilim basqarmasynyń basshysynyń keńesshisi Sábit Qontaev, QazUPÝ rektory Gaýhar Aldambergenova, «EDTECH-KZ» HBBO «KASIP» jobasynyń jetekshisi Sabina Iahiarova baiandama jasady.
Takir Balyqbaev óz baiandamasynda Qazaqstannyń bilim berý mekemelerindegi zaman talabyna sai básekege qabiletti pedagogikalyq kadrlardy daiarlaý máseleleri týraly keńinen áńgimelep berdi.
– Pedagogikalyq bilimdi damytý úshin bolashaq muǵalimderdiń ádistemelik daiyndyq mazmunyn ózgertý qajet. Bul baǵyttaǵy úlken ózgerister qazirdiń ózinde júrip jatyr. QazUPÝ oqytýshylary «Nazarbaev Ziiatkerlik» mektebinde mektep pánderiniń jańa mazmuny boiynsha biliktiligin arttyrýdan ótýde. 2018 jyly 32 muǵalim biliktiligin arttyrdy. 2018 jyldyń jeltoqsan aiynda bitirýshi kýrstardyń 455 stýdenti jańa bilim mazmunyn engizý ádistemesine úirendi. Sáýir aiynda mektep pánderiniń jańartylǵan mazmuny boiynsha professor-oqytýshylar quramyna mektepterde tájiribe uiymdastyrylady. Memleket qoǵamdaǵy pedagogtardyń erekshe mártebesin moiyndaidy jáne joǵary sapaly kásibi qyzmetti júzege asyrý úshin jaǵdai jasaýdy kózdep otyr. Bul úshin jalaqyny kóterý, muǵalimniń quqyqtary men mindetterinen basqa, muǵalimniń ar-namysy men qadir-qasietin qurmetteý, kásibi etikany saqtaý, tózimdilik, adamgershilik qasietter týraly arnaiy baptar engizilgen «QR Pedagog mártebesi týraly» Zańyn ázirleý jáne qabyldaý asa mańyzdy. Bilim berý máselelerin talqylaý kezinde mektep direktorlary praktikaǵa 3-4 kýrs stýdentterin qabyldaýǵa niet bildirdi. «Bilim berý Aliansynyń» sheshimi boiynsha pedagogikalyq joǵary oqý oryndary men bilim berý basqarmalary KASIP TECT kásibi diagnostikasyn qoldaný arqyly pedagog mamandyǵyna beiimdiligi bar 9-synyp oqýshylarynyń sanynan anyqtaýǵa tiis. Mektep bitirýshilerdi joǵary oqý oryndaryna aimaqtyq bilim berý organdarynyń ótinishi boiynsha tólemsiz nemese biýdjetten tys negizde – demeýshiler arqyly jiberýi múmkin. Bul qadamdar muǵalim retinde jumys jasaýǵa beiim daryndy jastardy tańdaýǵa múmkindik beredi, – dep rektor kókeige túigen oilaryn ortaǵa saldy.
Kezdesý barysynda Finliandiiadaǵy mektep jáne ýniversitet júieleriniń erekshelikteri, muǵalimderdi oqytý, muǵalimderdiń biliktiligin arttyrý, oqytý tájiribesin uiymdastyrý jáne ótkizý, tájiribe almasý máseleleri talqylandy. Ári qarai Konsortsiýmy músheleriniń birlesken is-sharalardyń turaqty jáne tiimdi, nátijeli jumys jasaýyna baǵyttalǵan aldaǵy úsh jylǵa «Bilim berý Aliansy» jumys baǵdarlamasy aiqyndaldy.
Ǵani Beisembaev basqosýǵa qatysýshylardy biraýyzdan qabyldanǵan jáne maquldanǵan «Bilim berý Aliansy» ázirlegen «2021 jylǵa arnalǵan Pedagogikalyq kadrlardy daiarlaý jol kartasy» baǵdarlamasymen tanystyrdy.
Is-shara sońynda ýniversitet rektory Takir Balyqbaev sheteldik qonaqtarǵa jáne barlyq qatysýshylarǵa pedagogikalyq bilim berýdiń ózekti máselelerin talqylaýda atsalysqandary úshin alǵys aitty.
Abai atyndaǵy QazUPÝ, Qoǵammen bailanys bólimi
