استانادا قاسىم-جومارت توقايەۆتى قولداۋ جونىندەگى حالىقتىق كواليسياسى ۇيىمداستىرۋ كوميتەتىنىڭ وتىرىسى ءوتتى. جيىن بارىسىندا الداعى سايلاۋ ناۋقانىنا دايىندىقتى ۇيىمداستىرۋ ماسەلەلەرى قارالدى.

بۇگىن قاسىم-جومارت توقايەۆتى قولداۋ جونىندەگى حالىقتىق كواليسياعا تاعى 15 قوعامدىق ۇيىم قوسىلدى. ولاردىڭ قاتارىندا ق ر كاسىپوداقتار فەدەراسياسى، قازاقستان جازۋشىلار وداعى، «SERPIN» ۇلتتىق ءبىلىم جانە يننوۆاسيالار پالاتاسى، «Bolashaq» قاۋىمداستىعى، قازاقستاننىڭ ەكولوگيالىق ۇيىمدارىنىڭ قاۋىمداستىعى، قازاقستاننىڭ مۇگەدەكتەر ۇيىمدارىنىڭ وداعى، «ادام قۇقىقتارى حارتياسى» قوعامدىق قورى بار.

سونداي-اق حالىقتىق كواليسياعا سيفرلىق ترانسفورماسيا قاۋىمداستىعى، رەسپۋبليكالىق ايەلدەردىڭ كەڭەسى، قازاقستان فۋتبول فەدەراسياسى، «اكەلەر وداعى»، «اسسامبلەيا جاستارى»، «حالىقارالىق قۇقىق قورعاۋ ورتالىعى»، تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارىنىڭ رەسپۋبليكالىق قاۋىمداستىعى، قازاقستاننىڭ «OSHAQ» جەرگىلىكتى قوعامداستىقتارىنىڭ حالىق كونگرەسى دە قوسىلدى.

«SERPIN» ۇلتتىق ءبىلىم جانە يننوۆاسيالار پالاتاسىنىڭ ءتوراعاسى مۇرات ابەنوۆتىڭ ايتۋىنشا، قوعامدىق كۇشتەر كواليسياعا بىرىككەندىكتەن دە بۇل سايلاۋ ناۋقانى جاڭا فورماتتا وتەدى. 

«Bolashaq» قاۋىمداستىعىنىڭ مۇشەلەرى دە حالىقتىق كواليسياعا كىرەتىندەرىن مالىمدەدى. «ءبىز ىشكى جانە سىرتقى ساياساتىمىزدىڭ تۇراقتىلىعى مەن ساباقتاستىعىن كورسەتۋىمىز كەرەك»، - دەدى قاۋىمداستىقتىڭ اتقارۋشى ديرەكتورى الىشەر دۇنگەنين.



«مەن 30 جىلدان استام ۋاقىتتان بەرى ادام قۇقىقتارىن قورعاۋمەن اينالىسىپ كەلەمىن. ءبىز كوپشىلىككە ادام قۇقىقتارىن قورعاۋ بويىنشا جۇرگىزىلىپ جاتقان جۇمىستىڭ ماڭىزدىلىعىن بىرلەسىپ ءتۇسىندىرۋ ءۇشىن كواليسياعا قوسىلامىز»، - دەدى «ادام قۇقىقتارى حارتياسى» قوعامدىق قورىنىڭ باسشىسى جەمىس تۇرماعامبەتوۆا.

سيفرلىق ترانسفورماسيا قاۋىمداستىعىنىڭ وكىلى سەرگەي وستاپيۋكتىڭ پىكىرىنشە، بۇگىندە قازاقستاندا IT نارىق قارقىندى دامىپ كەلەدى. «وسىنى ەسكەرە وتىرىپ، ءبىزدىڭ قاۋىمداستىق بۇگىن حالىقتىق كواليسياعا كىرەدى»، - دەدى ول.

جيىندا وڭىرلەردە ۇگىت-ناسيحات ءىس-شارالارىن وتكىزۋ، كانديداتتىڭ بايقاۋشىلارى مەن سەنىمدى تۇلعالارىن وقىتۋ، سايلاۋ ناۋقانىنىڭ قۇقىقتىق اسپەكتىلەرى جانە ت.ب. ماسەلەلەر تالقىلاندى.

وتىرىس بارىسىندا قاتىسۋشىلار ۇگىت-ناسيحات ناۋقانىن جۇرگىزۋ ءۇشىن كانديداتتىڭ سايلاۋ قورىنا قاراجات جيناۋعا قاتىستى مالىمدەمە جاسادى.



حالىقتىق كواليسيا مۇشەلەرى سايلاۋ قورىنا قارجىلاي قولداۋدى كانديداتتىڭ جاقتاۋشىلارى تەك ەرىكتى تۇردە جاسايتىنىن العا تارتتى.

وسىعان بايلانىستى ماجبۇرلەپ اقشا اۋدارتۋ تۋرالى تاراعان اقپارات ارانداتۋ بولىپ تابىلادى.

حالىقتىق كواليسيا مۇنداي ارەكەتتەردى قاتاڭ ايىپتايدى جانە ءتيىستى وتىنىشپەن قۇقىق قورعاۋ ورگاندارىنا جۇگىنەدى.

قۇقىققا قايشى قانداي دا ءبىر ارەكەتتەر انىقتالعان جاعدايدا،  حالىقتىق كواليسيا شتابىنا كەلەسى بايلانىس نومەرى ارقىلى حابارلاسۋدى سۇرايمىز: + 7 7172 707 616.

حالىقتىق كواليسيانىڭ باسپا ءسوز قىزمەتى