بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆامەن كەزدەستى. باسقوسۋدا تاراپتار سالاداعى اتقارىلىپ جاتقان جۇمىستار جايىنا توقتالدى.
اتاپ ايتقاندا تامارا قاسىم قىزى وڭىردەگى «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسى مەن «ورلەۋ» جوباسى سىندى ماڭىزدى باعدارلامالاردىڭ ورىندالۋ بارىسىنا كوڭىلى تولاتىنىن مالىمدەدى. مينيستر حانىم، سونداي-اق، وبلىستاعى مىندەتتى الەۋمەتتىك مەديسينالىق ساقتاندىرۋ جۇيەسىن حالىققا ءتۇسىندىرۋ جۇمىستارىن ودان ءارى جانداندىرۋ جايىن وبلىس اكىمىمەن تالقىلاپ، وڭدى ناتيجەلەرگە جەتۋدىڭ جولدارىن قاراستىردى.
كەزدەسۋدەن سوڭ قوس جەتەكشى الەۋمەتتىك سالالار اياسىندا اتقارىلىپ جاتقان جۇمىستار بويىنشا شاھارداعى بىرنەشە نىسانداردى ارالاۋعا شىقتى. مينيستر تامارا دۇيسەنوۆا مەن وبلىس اكىمى جانسەيىت تۇيمەبايەۆ، ەڭ الدىمەن، «ورلەۋ» جوباسىنا قاتىسۋشى شىمكەنتتىك تۇرعىن اينۇر جامانقۇلوۆانىڭ شاڭىراعىندا بولدى. جوبا يگىلىگىن پايدالانىپ، 500 مىڭ تەڭگەگە جۋىق قارجى العان كاسىپكەر بۇگىندە ءوز ۇيىنەن تىگىن سەحىن اشىپ، ايەلدەرگە ارنالعان ءساندى كيىمدەر تىگۋمەن اينالىسىپ جاتىر. «ازىرگە ايلىق تابىسىم 150 مىڭ تەڭگەنىڭ كولەمىندە» دەگەن اينۇر الداعى ۋاقىتتا «ورلەۋدىڭ» كەزەكتى مۇمكىندىكتەرىن ءتيىمدى پايدالانامىن دەپ وتىر.
ت.دۇيسەنوۆا «ورلەۋ» جوباسىنا قاتىسۋشى ازاماتشانىڭ جۇمىسىنا ساتتىلىك تىلەپ، «جاستار تاجىريبەسى» اياسىندا كومەكشى الۋعا كەڭەس بەردى.
«كاسىبىڭىزدى دوڭگەلەتىپ الىپ كەتۋ ءۇشىن ءسىز كومەكشى الىپ، وعان شىعىندالۋدىڭ قاجەتى جوق. ويتكەنى، ازىرگە تابىسىڭىز ونى كوتەرمەۋى مۇمكىن. سوندىقتان جەرگىلىكتى جۇمىسپەن قامتۋ ورتالىعىنا ءوتىنىش جازىپ، «جاستار تاجىريبەسى» باعدارلاماسىمەن وزىڭىزگە كومەكشى الۋىڭىزعا بولادى. ونىڭ التى ايلىق جالاقىسىن مەملەكەت تولەپ بەرەدى. ەگەر ول كومەكشىڭىز ويىڭىزدان شىعىپ جاتسا، كەلىسىمگە كەلىپ، ەڭبەكاقى تاعايىنداپ، جۇمىسقا الۋىڭىزعا مۇمكىندىگىڭىز بار. جالپى، حالىقتى ناتيجەلى جۇمىسپەن قامتۋ – تۇراقتىلىق پەن تابىسقا باستايدى. سوندىقتان وبلىستا وسى ماقساتتا اتقارىلىپ جاتقان جۇمىستارعا وڭ باعا بەرۋگە بولادى»، - دەدى تامارا قاسىم قىزى.
جۇمىسشى توپ ارنايى ايالداعان كەزەكتى نىسان – «ستاندارت سەمەنت» ج ش س عيماراتى بولدى. زاۋىت جۇمىسىمەن تانىسىپ، «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسى شەڭبەرىندە قۇرىلعان الەۋمەتتىك جۇمىس ورىندارىنا قاتىسۋشىلارمەن اڭگىمەلەسكەن ەڭبەك جانە حالىقتى الەۋمەتتىك قورعاۋ ءمينيسترى ونداعى جۇمىسشىلاردىڭ ماسەلەلەرىن تىڭداپ، مەملەكەت تاراپىنان جاسالىنىپ وتىرعان جەڭىلدىكتەردى باياندادى.
بۇگىندە 700-گە جۋىق جۇمىسشىسى بار «ستاندارت-سەمەنت» زاۋىتى 2011 جىلى قۇرىلعان. سەمەنت ءوندىرىپ، ونى ساتۋمەن اينالىساتىن سەرىكتەستىك جىلىنا 2 ملن. توننا ءونىم وندىرەدى. مۇنداعى سەمەنت ونىمدەرى قازاقستاننان بولەك، وزبەكستان مەن تاجىكستانعا ساۋدالانادى.
مينيستر مەن اكىم باستاعان توپ شىمكەنت قالالىق جۇمىسپەن قامتۋ ورتالىعىندا جالعاستى. جۇمىسپەن قامتۋ ورتالىعى 2011 جىلى قۇرىلعان. ال جاڭا عيمارات 2016 جىلدان باستاپ پايدالانىلۋدا. حالىقتى جۇمىسپەن قامتۋ سالاسى بويىنشا مۇندا قازىرگى تاڭدا 60-قا جۋىق قىزمەتكەر جۇمىس ىستەيدى. كۇنىنە مۇندا 200-گە جۋىق ادام كەلىپ، ءتۇرلى سالاداعى جۇمىستارعا جولداما الىپ جاتادى. عيماراتتىڭ تومەنگى قاباتىندا جالدامالى جۇمىسشىلارعا جاعداي جاسالعان. تامارا قاسىم قىزى شاھار جۇرتشىلىعىن جۇمىسپەن قامتۋ سالاسىنا جاۋاپتى جەتەكشىلەرمەن تىلدەسىپ، جۇمىستى ودان ءارى شيراتۋدى تاپسىردى.
