Búgin Ońtústik Qazaqstan oblysynyń ákimi Janseiit Túimebaev QR Eńbek jáne halyqty áleýmettik qorǵaý ministri Tamara Dúisenovamen kezdesti. Basqosýda taraptar saladaǵy atqarylyp jatqan jumystar jaiyna toqtaldy.
Atap aitqanda Tamara Qasymqyzy óńirdegi «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan» baǵdarlamasy men «Órleý» jobasy syndy mańyzdy baǵdarlamalardyń oryndalý barysyna kóńili tolatynyn málimdedi. Ministr hanym, sondai-aq, oblystaǵy mindetti áleýmettik meditsinalyq saqtandyrý júiesin halyqqa túsindirý jumystaryn odan ári jandandyrý jaiyn oblys ákimimen talqylap, ońdy nátijelerge jetýdiń joldaryn qarastyrdy.
Kezdesýden soń qos jetekshi áleýmettik salalar aiasynda atqarylyp jatqan jumystar boiynsha shahardaǵy birneshe nysandardy aralaýǵa shyqty. Ministr Tamara Dúisenova men oblys ákimi Janseiit Túimebaev, eń aldymen, «Órleý» jobasyna qatysýshy shymkenttik turǵyn Ainur Jamanqulovanyń shańyraǵynda boldy. Joba igiligin paidalanyp, 500 myń teńgege jýyq qarjy alǵan kásipker búginde óz úiinen tigin tsehyn ashyp, áielderge arnalǵan sándi kiimder tigýmen ainalysyp jatyr. «Ázirge ailyq tabysym 150 myń teńgeniń kóleminde» degen Ainur aldaǵy ýaqytta «Órleýdiń» kezekti múmkindikterin tiimdi paidalanamyn dep otyr.
T.Dúisenova «Órleý» jobasyna qatysýshy azamatshanyń jumysyna sáttilik tilep, «Jastar tájiribesi» aiasynda kómekshi alýǵa keńes berdi.
«Kásibińizdi dóńgeletip alyp ketý úshin siz kómekshi alyp, oǵan shyǵyndalýdyń qajeti joq. Óitkeni, ázirge tabysyńyz ony kótermeýi múmkin. Sondyqtan jergilikti jumyspen qamtý ortalyǵyna ótinish jazyp, «Jastar tájiribesi» baǵdarlamasymen ózińizge kómekshi alýyńyzǵa bolady. Onyń alty ailyq jalaqysyn memleket tólep beredi. Eger ol kómekshińiz oiyńyzdan shyǵyp jatsa, kelisimge kelip, eńbekaqy taǵaiyndap, jumysqa alýyńyzǵa múmkindigińiz bar. Jalpy, halyqty nátijeli jumyspen qamtý – turaqtylyq pen tabysqa bastaidy. Sondyqtan oblysta osy maqsatta atqarylyp jatqan jumystarǵa oń baǵa berýge bolady», - dedi Tamara Qasymqyzy.
Jumysshy top arnaiy aialdaǵan kezekti nysan – «Standart Tsement» JShS ǵimaraty boldy. Zaýyt jumysymen tanysyp, «Nátijeli jumyspen qamtýdy jáne jappai kásipkerlikti damytý» baǵdarlamasy sheńberinde qurylǵan áleýmettik jumys oryndaryna qatysýshylarmen áńgimelesken Eńbek jáne halyqty áleýmettik qorǵaý ministri ondaǵy jumysshylardyń máselelerin tyńdap, memleket tarapynan jasalynyp otyrǵan jeńildikterdi baiandady.
Búginde 700-ge jýyq jumysshysy bar «Standart-Tsement» zaýyty 2011 jyly qurylǵan. Tsement óndirip, ony satýmen ainalysatyn seriktestik jylyna 2 mln. tonna ónim óndiredi. Mundaǵy tsement ónimderi Qazaqstannan bólek, Ózbekstan men Tájikstanǵa saýdalanady.
Ministr men ákim bastaǵan top Shymkent qalalyq jumyspen qamtý ortalyǵynda jalǵasty. Jumyspen qamtý ortalyǵy 2011 jyly qurylǵan. Al jańa ǵimarat 2016 jyldan bastap paidalanylýda. Halyqty jumyspen qamtý salasy boiynsha munda qazirgi tańda 60-qa jýyq qyzmetker jumys isteidi. Kúnine munda 200-ge jýyq adam kelip, túrli saladaǵy jumystarǵa joldama alyp jatady. Ǵimarattyń tómengi qabatynda jaldamaly jumysshylarǵa jaǵdai jasalǵan. Tamara Qasymqyzy shahar jurtshylyǵyn jumyspen qamtý salasyna jaýapty jetekshilermen tildesip, jumysty odan ári shiratýdy tapsyrdy.
