بۇگىن اكىمدىك وتىرىسىندا سقو اكىمى عاۋەز نۇرمۇحامبەتوۆ وڭىردەگى سۋ تاسقىنى جاعدايى جايلى ايتتى،– دەپ حابارلايدى Dalanews.kz
وبلىس اكىمىنىڭ ايتۋىنشا، بيىل سەرگەيەۆ سۋ قويماسىندا العاش رەت ءۇشىنشى تولقىن بايقالۋدا. پەتروپاۆلدا تاسقىننىڭ شارىقتاۋ شەگى 28–30 ساۋىردە كۇتىلۋدە.
ەسىل وزەنىندەگى سۋ دەڭگەيىنىڭ كوتەرىلۋىنە بايلانىستى سۋ جىلداعىداي جايىلما القاپتارعا تارالۋدا. ءقازىر سۋ زارەچنىي كەنتى مەن رەچپورت ماڭىنداعى ساياجاي ۋچاسكەلەرىنە جايىلعان. بۇل ساياجايلاردا تۇرعىندار جوق، تجد مەن پوليسيا بەكەتتەرى قويىلدى.
ويقالا مەن بىلعارى كەنتىندەگى، قىزىلجار اۋدانىنىڭ تەپليچنوە جانە پريبرەجنوە اۋىلدارىندا جاعداي ەرەكشە باقىلاۋدا.
«سۋ تاسقىنى تولىق اياقتالعانعا دەيىن جاعدايدى تۇراقتى باقىلاۋدا ۇستايمىز. باستى باسىمدىق — ازاماتتاردىڭ ءومىرى مەن مۇلكىن ساقتاۋ. بارلىق قىزمەتتەر جوعارى دايىندىقتا بولىپ، جەدەل ارەكەت ەتۋ كەرەك»، — دەدى ءوڭىر باسشىسى.
ەسىل وزەنىنىڭ جايىلما القابىندا ورنالاسقان زارەچنىي كەنتىندە 6 كوپقاباتتى جانە 90 جەكە ءۇي، №13 ورتا مەكتەپ پەن تۇزەۋ مەكەمەسى بار. تۇرعىنداردىڭ قاۋىپسىزدىگىن قامتاماسىز ەتۋ جانە مۇلكىن قورعاۋ ماقساتىندا زارەچنىي كەنتىنىڭ تۇرعىندارىن ءقاۋىپسىز ايماقتارعا كوشىرۋ تۋرالى شەشىم قابىلداندى. وسى ماقساتتا 90 جانە 72 پاتەرلى ەكى كوپقاباتتى ءۇي تۇرعىزىلۋدا. سونىمەن قاتار، جاڭا تۇزەۋ مەكەمەسى مەن كوپاي شاعىن اۋدانىندا 600 ورىندىق مەكتەپ سالىنادى.
