Búgin ákimdik otyrysynda SQO ákimi Ǵaýez Nurmuhambetov óńirdegi sý tasqyny jaǵdaıy jaıly aıtty,– dep habarlaıdy Dalanews.kz

Oblys ákiminiń aıtýynsha, bıyl Sergeev sý qoımasynda alǵash ret úshinshi tolqyn baıqalýda. Petropavlda tasqynnyń sharyqtaý shegi 28–30 sáýirde kútilýde.

Esil ózenindegi sý deńgeıiniń kóterilýine baılanysty sý jyldaǵydaı jaıylma alqaptarǵa taralýda. Qazir sý Zarechnyı kenti men Rechport mańyndaǵy saıajaı ýchaskelerine jaıylǵan. Bul saıajaılarda turǵyndar joq, TJD men polısıa beketteri qoıyldy.

Oıqala men Bylǵary kentindegi, Qyzyljar aýdanynyń Teplıchnoe jáne Prıbrejnoe aýyldarynda jaǵdaı erekshe baqylaýda. 

«Sý tasqyny tolyq aıaqtalǵanǵa deıin jaǵdaıdy turaqty baqylaýda ustaımyz. Basty basymdyq — azamattardyń ómiri men múlkin saqtaý. Barlyq qyzmetter joǵary daıyndyqta bolyp,  jedel áreket etý kerek», — dedi óńir basshysy.

Esil ózeniniń jaıylma alqabynda ornalasqan Zarechnyı kentinde 6 kópqabatty jáne 90 jeke  úı, №13 orta mektep pen túzeý mekemesi bar. Turǵyndardyń qaýipsizdigin qamtamasyz etý jáne múlkin qorǵaý maqsatynda Zarechnyı kentiniń turǵyndaryn qaýipsiz aımaqtarǵa kóshirý týraly sheshim qabyldandy. Osy maqsatta 90 jáne 72 páterli eki kópqabatty úı turǵyzylýda. Sonymen qatar, jańa túzeý mekemesi men Kopaı shaǵyn aýdanynda 600 oryndyq mektep salynady.