شەرزات پولات ءىسى بويىنشا جابىرلەنۋشىلەردىڭ قۇقىعىن قورعايتىن ادۆوكات مەيىرمان شەكەيەۆ ارىپتەسى باعدات اماندوس ۇلىنىڭ نە سەبەپتى بۇل ىستەن شەتتەتىلگەنىن ءتۇسىندىردى. بۇعان دەيىن ەكەۋى سوتتا بىرگە جۇمىس ىستەگەن. الايدا، كەيىننەن باعدات اماندوس ۇلى ىستەن شەتتەتىلگەن، دەپ حابارلايدى Dalanews.kz.
مەيىرمان شەكەيەۆتىڭ ايتۋىنشا، ارىپتەسىنىڭ ارەكەتتەرى ءىستىڭ مۇددەسىنە قايشى بولعان. ول بىرنەشە رەت ەسكەرتۋ العانىمەن، جۇمىسقا جاۋاپكەرشىلىكپەن قاراماعان.
"ءبىز سوت پروسەسىنە قاتىسىپ جاتقاندا، ول قالادا كونسەرتكە قاتىسىپ ءجۇردى. تاپسىرىلعان مىندەتتەردى ورىندامادى. بۇعان قاتىستى ناقتى دالەلدەر بار"، – دەيدى شەكەيەۆ ءوزىنىڭ الەۋمەتتىك جەلىدەگى پاراقشاسىندا.
سونداي-اق، ول ءىستى جابىرلەنۋشى تاراپپەن تەك ءوزى — مەيىرمان شەكەيەۆ — كەلىسىمشارت نەگىزىندە جۇرگىزىپ جاتقانىن اتاپ ءوتتى. ياعني، باعدات اماندوسۇلىن بۇل ىسكە ءوزى تارتقان. الايدا، بۇل شەشىمى بۇگىندە وكىنىش تۋعىزىپ وتىر.
شەكەيەۆتىڭ ايتۋىنشا، كەلىسىمشارت ءماتىنىن باعدات اماندوس ۇلى ءوزى دايىنداپ، ءوزى قول قويعان. سول قۇجاتتا ول سوت پروسەسى اياقتالعانعا دەيىن قىلمىستىق ءىس بويىنشا باق-تا، الەۋمەتتىك جەلىلەردە نەمەسە كەز كەلگەن قوعامدىق الاڭدا پىكىر بىلدىرۋگە، سۇحبات بەرۋگە قۇقىلى ەمەس ەكەنىن ناقتى جازعان. دەگەنمەن، وسى تالاپتى ءوزى بۇزعان.
"جابىرلەنۋشى تاراپ بىزگە كوپتەگەن بەينەماتەريال جىبەردى. ول ەكى قىزعا قاتىستى مالىمدەمە جاساپ، ولاردىڭ مۇددەسىن قورعايتىن ادام رەتىندە كورىندى. بۇل ارەكەت – شەرزات ءىسىنىڭ مۇددەسىنە قايشى"، – دەپ مالىمدەدى مەيىرمان شەكەيەۆ.
ءسوز سوڭىندا ول باعدات اماندوس ۇلىنىڭ سوڭعى مالىمدەمەسىن وزىنە قابىلدايتىنىن ايتىپ، وعان استارلاپ ەمەس، اشىق سويلەۋگە كەڭەس بەردى.
ەسكە سالايىق، بۇعان دەيىن شەرزات بولاتتىڭ ولىمىنە قاتىستى تالدىقورعاندا ءوتىپ جاتقان سوت پروسەسىندە جابىرلەنۋشى تاراپتىڭ مۇددەسىن قورعاپ جۇرگەن ادۆوكاتتار توبىنىڭ اراسىندا كەلىسپەۋشىلىك تۋىنداپ، بىرنەشە قورعاۋشى ىستەن شەتتەتىلگەن بولاتىن. بۇل تۋرالى الەۋمەتتىك جەلىدە ادۆوكات باعدات اماندوس ۇلى ءمالىم ەتتى.
ونىڭ سوزىنشە، قورعاۋشىلار توبىن باسقارىپ وتىرعان مەيىرمان شەكەيەۆتىڭ اينالاسىنداعى كەي تۇلعالار كاسىبي ەمەس، جەكە امبيسياعا نەگىزدەلگەن ارەكەتكە جول بەرگەن.
"وسى ىسكە ۇلكەن جاۋاپكەرشىلىكپەن كەلدىم. 10 جىلدان بەرى ءتۇرلى سوت پروسەستەرىنە قاتىسىپ جۇرگەن تاجىريبەلى قورعاۋشىمىن. بۇل ءىستى دە بار ىنتاممەن زەرتتەپ، اپتاسىنا ەكى رەت سوت وتىرىسىنا قاتىسىپ، قالعان كۇندەرى دايىندىقپەن اينالىستىم. جابىرلەنۋشى تاراپتىڭ مۇددەسىن شىن نيەتپەن قورعاۋعا تىرىستىم. ءبىراق بۇل ءىستى اتاق ءۇشىن قولعا العاندار مەنىڭ جۇمىسىم مەن نيەتىمە كەدەرگى كەلتىردى"، – دەيدى ول.
باعدات اماندوس ۇلى سوت پروسەسى – “شوۋ ەمەس، ادام تاعدىرى شەشىلەتىن ماڭىزدى الاڭ” ەكەنىن ەسكە سالىپ، ارىپتەستەرىنىڭ تاراپىنان جاسالعان قىسىمدى كاسىبيلىك ەمەس، ەگو مەن مونوپوليا دەپ باعالادى.
