Sherzat Polat isi boiynsha jábirlenýshilerdiń quqyǵyn qorǵaityn advokat Meiirman Shekeev áriptesi Baǵdat Amandosulynyń ne sebepti bul isten shettetilgenin túsindirdi. Buǵan deiin ekeýi sotta birge jumys istegen. Alaida, keiinnen Baǵdat Amandosuly isten shettetilgen, dep habarlaidy Dalanews.kz.
Meiirman Shekeevtiń aitýynsha, áriptesiniń áreketteri istiń múddesine qaishy bolǵan. Ol birneshe ret eskertý alǵanymen, jumysqa jaýapkershilikpen qaramaǵan.
"Biz sot protsesine qatysyp jatqanda, ol qalada kontsertke qatysyp júrdi. Tapsyrylǵan mindetterdi oryndamady. Buǵan qatysty naqty dálelder bar", – deidi Shekeev óziniń áleýmettik jelidegi paraqshasynda.
Sondai-aq, ol isti jábirlenýshi tarappen tek ózi — Meiirman Shekeev — kelisimshart negizinde júrgizip jatqanyn atap ótti. Iaǵni, Baǵdat Amandosulyn bul iske ózi tartqan. Alaida, bul sheshimi búginde ókinish týǵyzyp otyr.
Shekeevtiń aitýynsha, kelisimshart mátinin Baǵdat Amandosuly ózi daiyndap, ózi qol qoiǵan. Sol qujatta ol sot protsesi aiaqtalǵanǵa deiin qylmystyq is boiynsha BAQ-ta, áleýmettik jelilerde nemese kez kelgen qoǵamdyq alańda pikir bildirýge, suhbat berýge quqyly emes ekenin naqty jazǵan. Degenmen, osy talapty ózi buzǵan.
"Jábirlenýshi tarap bizge kóptegen beinematerial jiberdi. Ol eki qyzǵa qatysty málimdeme jasap, olardyń múddesin qorǵaityn adam retinde kórindi. Bul áreket – Sherzat isiniń múddesine qaishy", – dep málimdedi Meiirman Shekeev.
Sóz sońynda ol Baǵdat Amandosulynyń sońǵy málimdemesin ózine qabyldaitynyn aityp, oǵan astarlap emes, ashyq sóileýge keńes berdi.
Eske salaiyq, buǵan deiin Sherzat Bolattyń ólimine qatysty Taldyqorǵanda ótip jatqan sot protsesinde jábirlenýshi taraptyń múddesin qorǵap júrgen advokattar tobynyń arasynda kelispeýshilik týyndap, birneshe qorǵaýshy isten shettetilgen bolatyn. Bul týraly áleýmettik jelide advokat Baǵdat Amandosuly málim etti.
Onyń sózinshe, qorǵaýshylar tobyn basqaryp otyrǵan Meiirman Shekeevtiń ainalasyndaǵy kei tulǵalar kásibi emes, jeke ambitsiiaǵa negizdelgen áreketke jol bergen.
"Osy iske úlken jaýapkershilikpen keldim. 10 jyldan beri túrli sot protsesterine qatysyp júrgen tájiribeli qorǵaýshymyn. Bul isti de bar yntammen zerttep, aptasyna eki ret sot otyrysyna qatysyp, qalǵan kúnderi daiyndyqpen ainalystym. Jábirlenýshi taraptyń múddesin shyn nietpen qorǵaýǵa tyrystym. Biraq bul isti ataq úshin qolǵa alǵandar meniń jumysym men nietime kedergi keltirdi", – deidi ol.
Baǵdat Amandosuly sot protsesi – “shoý emes, adam taǵdyry sheshiletin mańyzdy alań” ekenin eske salyp, áriptesteriniń tarapynan jasalǵan qysymdy kásibilik emes, ego men monopoliia dep baǵalady.
