جامبىل وبلىسىندا كەيىنگى كەزدە وقۋشىلار اراسىندا ءولىم-جىتىم كوبەيدى. ءوڭىر اكىمى ەربول قاراشوكەيەۆ وسى ماسەلەگە بايلانىستى شۇعىل كەڭەس وتكىزدى، – دەپ حابارلايدى Dalanews.kz.
قاراشوكەيەۆ كىمدەرگە شۇيلىكتى؟
وبلىس اكىمىنىڭ پىكىرىنشە، جاڭا وقۋ جىلى باستالعالى بەرى وڭىردە كامەلەتكە تولماعاندار اراسىندا اسا اۋىر قىلمىستار جيىلەپ كەتۋى جاعداي ۋشىعىپ بارا جاتقانىن كورسەتەدى.
"سىزدەردى تىڭداساق، بارلىق جۇمىستار ءجۇرىپ جاتىر، اۋقىمدى شارالار اتقارىلىپ جاتىر دەيسىزدەر. ءبىراق ناتيجەسىن وزدەرىڭىز كورىپ وتىرسىزدار. سوڭعى ەكى اپتادا ءۇش قايعىلى جاعداي بولدى. دەمەك سىزدەردىڭ جۇمىس تاسىلدەرىڭىز ءتيىمسىز. وقۋشىلاردىڭ تاربيەسى جونىندە مەكتەپ، اتا-انا، قوعام ۇشتىگىنىڭ ءوزارا بىرلەسكەن جۇمىستارىن باسىنان قاراۋ كەرەك!" – دەي كەلە وبلىس اكىمى ناتيجەسىز جۇمىستاردى سىنعا الدى.
وبلىس اكىمى اپپاراتىنا وبلىس اكىمىنىڭ ورىنباسارى سەرىك سالەموۆكە سوگىس، تاراز قالاسىنىڭ اكىمى باقىتجان ورىنبەكوۆكە، شۋ اۋدانىنىڭ اكىمى باقىتجان جانىبەكوۆكە، ءبىلىم باسقارماسىنىڭ باسشىسى نۇربەك ورشىبەكوۆكە سونداي-اق الەۋمەتتىك سالاعا جاۋاپتى تاراز قالاسى اكىمىنىڭ ورىنباسارى ۇلانا سلامبەكوۆا مەن شۋ اۋدانى اكىمىنىڭ ورىنباسارى نايمان سۇلتانبايەۆقا قاتاڭ سوگىس تۇرىندەگى تارتىپتىك شارا قابىلداۋ تاپسىرىلدى.
جامبىلداعى كريمينالدىق احۋال
بۇعان دەيىن باس پروكۋرور بەرىك اسىلوۆ قىلمىس دەڭگەيى وسكەن وڭىرلەر قاتارىندا جامبىل وبلىسىن دا اتاعان ەدى. وڭىردە بيىل العاشقى ايلاردا قىلمىس دەڭگەيى 21%-عا وسكەنى بايقالعان.
ەسكە سالايىق، كەشە جامبىل وبلىسىندا جاسوسپىرىمدەر اراسىنداعى توبەلەس وقۋشىنىڭ ولىمىمەن اياقتالعانى حابارلاندى.
