رەسەيدەگى قازاقستاننىڭ بۇرىنعى ەلشىسى يمانعالي تاسماعامبەتوۆ ءوز ەركىمەن وتستاۆكاعا كەتتى، دەپ مالىمدەدى سىرتقى ىستەر ءمينيسترى مۇحتار تىلەۋبەردى ۇكىمەت دالىزىندە جۋرناليستەرگە بەرگەن سۇقباتىندا، دەپ حابارلايدى Dalanews.kz.
- ول زەينەت جاسىنا جەتۋىنە بايلانىستى ءوز ەركىمەن جۇمىستان شىقتى. سوندىقتان دا مەنىڭ تۇسىنۋىمشە، ول ءسىم جۇيەسىندە قالمايدى، - دەدى مۇحتار تىلەۋبەردى.
مينيستر، قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆ كەتكەننەن كەيىن ونىڭ قىزمەتىن ۋاقىتشا كىم اتقاراتىنىن ايتىپ بەردى.
«كەڭەسشى-ەلشى اتقارادى. كەشە ارنايى بۇيرىققا قول قويدىم. نۇرجان قاجياقباروۆ ەلشىلىكتەگى ەكىنشى ادام، وعان رەسەي فەدەراسياسىنداعى قازاقستان رەسپۋبليكاسى ىستەرىنىڭ ۋاقىتشا سەنىمدى وكىلى مىندەتى جۇكتەلدى. نۇرجان قاجياقباروۆ جاڭا ەلشى تاعايىندالىپ، رەسەي پرەزيدەنتىنە سەنىم گراموتاسىن تاپسىرعانعا دەيىن مىندەتىن اتقاراتىن بولادى»، - دەدى ول.
18 جەلتوقساندا مەملەكەت باسشىسىنىڭ جارلىعىمەن تاسماعامبەتوۆ رەسەي فەدەراسياسىنداعى قازاقستان رەسپۋبليكاسىنىڭ توتەنشە جانە وكىلەتتى ەلشىسى قىزمەتىنەن بوساتىلدى. 9 جەلتوقساندا ول 63 جاسقا تولدى.
