مەملەكەتتىك قارىزدى قايتارۋ ەل بيۋدجەتى مەن قارجى جۇيەسىنە ايتارلىقتاي سالماق سالىپ وتىر. ءقازىر سىرتقى بەرەشەك 32 تريلليون تەڭگە شاماسىندا. سوعان قاراماستان قارجى ءمينيسترى الاڭداۋعا ەش نەگىز جوق دەپ سانايدى، دەپ حابارلايدى Dalanews.kz.

"حالىقارالىق ساراپشىلاردىڭ ايتۋىنشا، بۇل جوعارى دەڭگەي ەمەس، ونى باسقارۋعا بولادى. مەملەكەتتىك قارىز ءوسىپ جاتىر، ونى وتەۋگە دە قوماقتى قاراجات كەتىپ جاتىر. ءبىراق ءقازىر بارلىعى ءبىزدىڭ بەلگىلەنگەن ليميت اياسىندا. 2024-2025 جىلدارى بۇرىنعى وبليگاسيا بويىنشا قارىزدى قايتارۋدىڭ شارىقتاۋ كەزەڭى. كەيىن مەملەكەتتىك قارىزدىڭ دەڭگەيى تۇراقتالادى. ونى ازايتۋ ءۇشىن ءبىرقاتار شارا قابىلدانىپ جاتىر"، دەيدى ق ر قارجى ءمينيسترى ءمادي تاكييەۆ.

مينيستر جاڭا سالىق كودەكسى ارقىلى تابىستى ارتتىرىپ، بيۋدجەت تاپشىلىعىن ازايتامىز دەگەن ءۋاج ايتقانىمەن، سەناتورلار بۇعان كەلىسپەيدى. ءداپۋتاتتاردى، اسىرەسە، قارىزدىڭ كولەمى مەن وعان جۇمسالىپ جاتقان شىعىن الاڭداتىپ وتىر. بىلتىر مەملەكەتتىك قارىزدى وتەۋ مەن وعان قىزمەت كورسەتۋگە 5 جارىم تريلليون تەڭگە جۇمسالعان ەكەن. وسىنىڭ ءبارىن ەسكەرە كەلە، قازىرگى جاعدايدى قالىپتى دەپ باعالاۋ ورىنسىز دەيدى سەنات ءتوراعاسى.

"ءسىز ءبارى شەكتەۋلەر اياسىندا، ءبارى دۇرىس دەيسىز، ءبىراق ءبىز بيۋدجەتتى كورىپ وتىرمىز. بيۋدجەتتىڭ ناقتى كىرىسىنىڭ 42 پايىزى وسى قارىزعا باعىتتالعان. ونىڭ تەڭ جارتىسى — تەك پايىزىن تولەۋگە كەتكەن قاراجات. بۇل كورسەتكىش بىزگە نەگە بۇلاي بولىپ جاتقانىن، قالاي باسقارۋ كەرەك ەكەنىن تەرەڭىرەك تالداۋعا نەگىز بولۋى كەرەك"، دەيدى سەنات ءتوراعاسى ماۋلەن اشىمبايەۆ.