قاراعاندى وبلىسىنداعى شۇباركول كومىر كەن ورنىن يگەرۋشى "شۇباركول كومىر" اق ءىرى كەلىسىمشارتقا قول جەتكىزگەنىن جاريالادى. KASE سايتىندا جاريالانعان اقپاراتقا سايكەس، 23 مامىردا "شۇباركول كومىر" اق Telf AG كومپانياسىمەن قانداي دا ءبىر ءىرى مامىلە بويىنشا شارت جاساسقان. ازىرگە، اتالعان كەلىسىمشارت تۋرالى ەگجەي – تەگجەيلى مالىمەتتەر جوقتىڭ قاسى، ءبىراق مامىلە سوماسى 32،2 ملرد تەڭگەدەن اساتىنى بەلگىلى، دەپ حابارلايدى Dalanews.kz.
"بۇل رەتتە اقپارات بانكتىك جانە كوممەرسيالىق قۇپيالاردى ساقتاۋعا بايلانىستى جاريا ايتىلمايدى. 2023 جىلى Telf AG تۋرا وسىعان ۇقساس شارتتارمەن "قازحروممەن" مامىلە جاساسقان. بۇل جولى قازاقستاندىق كومىر ەكسپورتىنىڭ تاسىمالى تۋرالى ءسوز بولىپ وتىر دەپ بولجاۋعا بولادى" دەپ جازادى orda.kz.
رەسمي تۇردە Telf AG - لۋگانو قالاسىندا تىركەلگەن شۆەيساريالىق كومپانيا.
رەسمي اقپاراتقا سايكەس، ول 1993 جىلدان باستاپ جۇمىس ىستەيدى جانە ءوز قىزمەتىن بۇرىنعى كسرو ەلدەرىندە مۇناي ونىمدەرىن ساتۋدان باستاعان. 2010 جىلى Telf AG قازاقستان كومىرى تاسىمالى بويىنشا ستراتەگيالىق وفتەيك-كەلىسىمشارتقا قول جەتكىزەدى، ال 2014 جىلدان باستاپ "قازحروممەن" بىرنەشە ءىرى مامىلەلەر جاساسقان.
بۇگىنگى تاڭدا Telf AG اكتيۆتەرى 2 ميلليارد دوللارعا باعالانادى. اتالعان كومپانيا ءوزىن بارشاعا فەرروحروم ساۋداسىنىڭ الەمدىك كوشباسشىسى رەتىندە تانىستىرادى.
TELF AG رەسەي فەدەراسياسىمەن تىعىز بايلانىستا. كومپانيانىڭ كوشباسشىسى - سانكت-پەتەربۋرگ مەملەكەتتىك تەحنولوگيالىق ينستيتۋتىنىڭ تۇلەگى ستانيسلاۆ كوندراشوۆ. تاعى ءبىر توپ-مەنەدجەرى - باس اتقارۋشى ديرەكتور نيكولاي ليتۆينەنكو دا ممۋ تۇلەگى.
ايتا كەتسەك،بۇگىندەرى كومپانيانىڭ باقىلاۋ پاكەتىن يەلەنۋ ءۇشىن ءوزىنىڭ مارقۇم اكەسى ءاليجان يبراگيموۆتىڭ سەرىكتەستەرىنەن ۇلەستەرىن ساتىپ الماق شۋحرات يبراگيموۆ باسقاراتىن ERG-گە "قازحروم"،"قازاقستان ءاليۋمينييى"، سسكوب، قازاقستاندىق ەلەكتروليز زاۋىتى،
"ەۋروازيالىق ەنەرگەتيكالىق كورپوراسيا"، "شۇباركول كومىر"، "ترانسكوم" كولىك توبى جانە باسقا دا كاسىپورىندار تيەسىلى.
