شقو قۇرىلىس، ەنەرگەتيكا جانە تۇكش باسقارماسىنىڭ اقپاراتىنا سۇيەنسەك، ينۆەستور اككرەديتتەلگەن ۇيىمدى تارتۋ ارقىلى كەشەندى تەحنيكالىق تەكسەرۋدى جۇزەگە اسىرعان. ءقازىر ءبىلىم بەرۋ مەكەمەسىنىڭ قۇرىلىسىن اياقتاۋعا ارنالعان جوبالاۋ-سمەتالىق قۇجاتتامانى ازىرلەۋدى جۇرگىزىپ جاتىر.
– جاسالعان شارتقا سايكەس ينۆەستور جسق ازىرلەۋ اياقتالعاننان كەيىن قۇرىلىستى 18 اي ىشىندە اياقتاۋعا مىندەتتى، – دەلىنگەن اقپاراتتا.
ءوز كەزەگىندە ءبىلىم بەرۋ سالاسىنداعى وبلىستىق ۋاكىلەتتى ورگان قاجەتتىلىگى مەن وقۋشىلار كونتينگەنتىن ەسكەرە وتىرىپ، ءبىلىم بەرۋ مەكەمەسىنىڭ بەيىنىن انىقتاۋى كەرەك. وسى زەرتتەۋدىڭ ناتيجەلەرى بويىنشا جاڭا وبەكتىنىڭ باعىتى شەشىلەتىن بولادى.
ەستەرىڭىزگە سالا كەتەيىك، 19 تۇرعىن اۋدانىندا ورنالاسقان قۇرىلىس وبەكتىسى 2011 جىلى ق ر ءبىلىم مينيسترلىگىنىڭ تاپسىرىسى بويىنشا رەسپۋبليكالىق بيۋدجەت ەسەبىنەن باستالعان بولاتىن.
وندا جىل سايىن كەم دەگەندە 700 ستۋدەنت وقىپ، ماشينا جاساۋ سالاسىنىڭ جۇمىسشى ماماندىقتارىن يگەرۋى كەرەك ەدى. الايدا بيۋدجەت قاراجاتىن ۇرلاۋ فاكتىلەرى انىقتالىپ، ناتيجەسىندە ۋاكىلەتتى ورگاندار 2012 جىلى ق ر بعم جاۋاپتى تۇلعالارى مەن قۇرىلىسقا قاتىسۋشىلارعا قاتىستى قىلمىستىق ءىس قوزعادى.
وسى ورايدا 19 تۇرعىن اۋدانىندا تۇرعىن ءۇي قۇرىلىسىنىڭ سەرپىندى ءوسىپ كەلە جاتقانىن ايتىپ ءوتۋ قاجەت. اۋداننىڭ ەگجەي-تەگجەيلى جوسپارلاۋ جوباسىنا سايكەس «جايلى مەكتەپ» ۇلتتىق جوباسى شەڭبەرىندە قۋاتى 2024 جىلى ىسكە قوسىلاتىن 600 ورىندىق 2 جالپى ءبىلىم بەرەتىن مەكتەپتىڭ قۇرىلىسى باستالدى. سونداي-اق ءبىلىم بەرۋ ينفراقۇرىلىمىن قولداۋ قورىنىڭ قاراجاتى ەسەبىنەن 400 ورىندىق ءبىلىم بەرۋ مەكەمەسىن سالۋ ماسەلەسى پىسىقتالىپ جاتىر.
