سەرەبريانسك قالاسىندا “ءبىر اۋىل – ءبىر ءونىم” كورمە-جارمەڭكەسى ءوتتى، دەپ حابارلايدى Dalanews.kz Altainews.kz-كە سىلتەمە جاساپ.
التاي اۋدانىنىڭ 30-عا جۋىق بيزنەس وكىلى ءوز ونىمدەرىن ۇسىندى. اتاپ ايتساق، ەت، ءسۇت، بالىق، بال، نان-توقاش ونىمدەرى، قولدان جاسالعان سابىن، تاعى باسقا تاۋارلار كوپشىلىككە ۇسىنىلدى. جارمەڭكەنىڭ باستى ماقساتى – جەرگىلىكتى ءونىمنىڭ ساپاسىن ارتتىرۋ، وڭىرلىك برەندتەردى شىعارۋ، كاسىپكەرلەر ونىمدەرىنىڭ نارقىن كەڭەيتۋ جانە ولاردى ەكسپورتتاۋ.
“بۇل كورمە – تاۋار وندىرۋشىلەردىڭ جەتىستىكتەرىمەن تانىسۋدىڭ، ولاردىڭ ونىمدەرىن ساتىپ الۋدىڭ، ىسكەرلىك بايلانىستار ورناتۋدىڭ بىرەگەي مۇمكىندىگى. كاسىپكەرلەرگە مەملەكەتتىڭ بەرىلىپ جاتقان كومەكتەرى، بيزنەستى قولداۋعا ارنالعان باعدارلامالار جايلى ۇنەمى تۇسىندىرمە جۇمىستارىن جۇرگىزىپ وتىرامىز”، دەدى التاي اۋدانىنىڭ كاسىپكەرلىك، ونەركاسىپ جانە تۋريزم ءبولىمىنىڭ باسشىسى مەدەت ساحارييەۆ.
سەرەبريانسك قالاسىنىڭ تۇرعىنى، جەكە كاسىپكەر ايجان قايسەنوۆا مەملەكەتتىڭ قولداۋىنىڭ ارقكسىندا قايتارىمسىز گرانتتىڭ يەسى اتانىپ، سابىن شىعارۋدى قولعا العان بولاتىن. كاسىبىنىڭ جەمىسىن كورىپ وتىرعان كوپ بالالى انا، بۇگىنگى كورمە-جارمەڭكەگە ءوز ءونىمىن الىپ كەلدى.
“مەن كوپ بالالى انا رەتىندە، قايتارىمسىز گرانتتىڭ يەسى اتانىپ، ءوز كاسىبىمدى اشۋعا مۇمكىندىك الدىم. قازىرگى تاڭدا شارۋاشىلىق سابىنىن جاساپ شىعارامىز. ساپاسى وتە جوعارى. ازىرگە سەحتا ەكى ادام جۇمىس ىستەيمىز. وسى ورايدا كىر سابىننىڭ كۇندەلىكتى تۇرمىستا ەڭ قاجەتتى زات ەكەنىن ەسكەرسەك، وعان دەگەن سۇرانىستىڭ ارتارى ءسوزسىز. الداعى ۋاقىتتا ءونىمنىڭ كولەمىن ارتتىرۋ جوسپاردا بار”، دەدى جەكە كاسىپكەر ايجان قايسەنوۆا.
سەرەبريانسك قالاسىندا «ءبىر اۋىل – ءبىر ءونىم» كورمە-جارمەڭكەسىنە ارنايى بارعان شىعىس قازاقستان وبلىسىنىڭ اكىمى ەرمەك كوشەربايەۆ، اۋدان كاسىپكەرلەرىنە مەملەكەت تاراپىنان شاعىن جانە ورتا بيزنەس يەلەرىنە مەيلىنشە قولداۋ كورسەتىپ، كاسىبىن دامىتۋعا قولايلى جاعداي جاساپ جاتقانىن جانە جەڭىلدەتىلگەن نەسيە الۋ ءۇشىن «اۋىل اماناتى» جوباسىنا قاتىسۋعا، مەملەكەتتىك باعدارلامالار مەن جوبالالار ارقىلى نەسيە الۋعا باعىت-باعدار بەردى. ءارقاشاندا جەرگىلىكتى وندىرۋشىلەرگە قولداۋ كورسەتىلەتىنىن جەتكىزدى.
