Serebriansk qalasynda “Bir aýyl – bir ónim” kórme-jármeńkesi ótti, dep habarlaidy Dalanews.kz Altainews.kz-ke silteme jasap.
Altai aýdanynyń 30-ǵa jýyq biznes ókili óz ónimderin usyndy. Atap aitsaq, et, sút, balyq, bal, nan-toqash ónimderi, qoldan jasalǵan sabyn, taǵy basqa taýarlar kópshilikke usynyldy. Jármeńkeniń basty maqsaty – jergilikti ónimniń sapasyn arttyrý, óńirlik brendterdi shyǵarý, kásipkerler ónimderiniń narqyn keńeitý jáne olardy eksporttaý.
“Bul kórme – taýar óndirýshilerdiń jetistikterimen tanysýdyń, olardyń ónimderin satyp alýdyń, iskerlik bailanystar ornatýdyń biregei múmkindigi. Kásipkerlerge memlekettiń berilip jatqan kómekteri, biznesti qoldaýǵa arnalǵan baǵdarlamalar jaily únemi túsindirme jumystaryn júrgizip otyramyz”, dedi Altai aýdanynyń kásipkerlik, ónerkásip jáne týrizm bóliminiń basshysy Medet Sahariev.
Serebriansk qalasynyń turǵyny, jeke kásipker Aijan Qaisenova memlekettiń qoldaýynyń arqksynda qaitarymsyz granttyń iesi atanyp, sabyn shyǵarýdy qolǵa alǵan bolatyn. Kásibiniń jemisin kórip otyrǵan kóp balaly ana, búgingi kórme-jármeńkege óz ónimin alyp keldi.
“Men kóp balaly ana retinde, qaitarymsyz granttyń iesi atanyp, óz kásibimdi ashýǵa múmkindik aldym. Qazirgi tańda sharýashylyq sabynyn jasap shyǵaramyz. Sapasy óte joǵary. Ázirge tsehta eki adam jumys isteimiz. Osy oraida kir sabynnyń kúndelikti turmysta eń qajetti zat ekenin eskersek, oǵan degen suranystyń artary sózsiz. Aldaǵy ýaqytta ónimniń kólemin arttyrý josparda bar”, dedi jeke kásipker Aijan Qaisenova.
Serebriansk qalasynda «Bir aýyl – bir ónim» kórme-jármeńkesine arnaiy barǵan Shyǵys Qazaqstan oblysynyń ákimi Ermek Kósherbaev, aýdan kásipkerlerine memleket tarapynan shaǵyn jáne orta biznes ielerine meilinshe qoldaý kórsetip, kásibin damytýǵa qolaily jaǵdai jasap jatqanyn jáne jeńildetilgen nesie alý úshin «Aýyl amanaty» jobasyna qatysýǵa, memlekettik baǵdarlamalar men jobalalar arqyly nesie alýǵa baǵyt-baǵdar berdi. Árqashanda jergilikti óndirýshilerge qoldaý kórsetiletinin jetkizdi.
