شىعىس قازاقستان وبلىسىنىڭ اكىمى نۇرىمبەت ساقتاعانوۆ كاتونقاراعاي اۋدانى ءتۋريزمدى دامىتۋدا ۇلكەن الەۋەتكە يە ەكەنىن اتاپ ءوتتى،- دەپ حابارلايدى Dalanews.kz
«كاتونقاراعاي اۋدانى ءۇشىن گەوگرافيالىق ەرەكشەلىكتەردى ەسكەرە وتىرىپ، ەكونوميكانى ءارتاراپتاندىرۋ باعىتىنداعى نەگىزگى باسىمدىق – تۋريزم. بۇل سالا شاعىن جانە ورتا بيزنەستى دامىتۋعا سەرپىن بەرىپ، حالىقتى ءونىمدى ءارى جوعارى تابىستى جۇمىسپەن قامتاماسىز ەتەدى»، – دەدى وبلىس اكىمى.
بيىل كاتونقاراعاي اۋدانىندا تۋريزم سالاسىندا بەس جوبا جۇزەگە اسىرىلۋدا:
اقشارباق اۋىلىنداعى «ۆەرح-كاتۋن» پانتامەن ەمدەۋ ورتالىعىن كەڭەيتۋ؛
- ارشاتى اۋىلىندا «Altay Resort» كۋرورتتىق كەشەنىنىڭ قۇرىلىسى؛
- كاتونقاراعاي اۋىلىندا «Altay Terra Resort» تۋريستىك كەشەنىن سالۋ؛
- ۇرىل اۋىلىندا «مۇزتاۋ» ەكوقوناق ءۇيىنىڭ مەيرامحاناسىن سالۋ؛
- توپقايىڭ اۋىلىندا «Qaton Qaragai Resort&SPA» دەمالىس بازاسىن كەڭەيتۋ.
ماۋسىم ايىندا كاتونقاراعاي اۋدانىندا «التاي – تۇركى الەمىنىڭ التىن بەسىگى» حالىقارالىق مۋزىكالىق فەستيۆالى ءوتتى. ءىس-شاراعا 10 مىڭنان استام تۋريست قاتىستى. قاتىسۋشىلاردىڭ 80%-دان استامى ەلىمىزدىڭ باسقا وڭىرلەرى مەن رەسەي، تۇركيا، وزبەكستان، قىرعىزستان، موڭعوليا، تۇرىكمەنستان، ازەربايجان سىندى شەت مەملەكەتتەردەن كەلگەن بولاتىن.
وتكەن جىلى كاتونقاراعاي اۋىلىندا جەكە ينۆەستيسيا ەسەبىنەن «قاراتاي»، «ۇلناز» قوناق ۇيلەرىنىڭ قىزمەتى كەڭەيتىلىپ، «بايان» عيماراتى قوناق ءۇي رەتىندە قايتا جاڭعىرتىلدى، سوگورنوە اۋىلىنداعى جولايرىقتا كەمپينگ سالىندى، بەلقاراعاي اۋىلىنداعى «بايان» پانتايەن ەمدەۋ ورتالىعى كەڭەيتىلدى.
2026 جىلى «Tor’re Altay Invest» ءجشس-نىڭ 120 ورىندىق «Wellness Resort» ساناتوريي-ساۋىقتىرۋ كەشەنىنىڭ قۇرىلىسىن باستاۋ جوسپارلانۋدا.
ستاتيستيكالىق دەرەكتەرگە سايكەس، قازىرگى ۋاقىتتا اۋداندا تۋريستەرگە ارنالعان 50 ورنالاستىرۋ نىسانى تىركەلگەن، ال وتكەن جىلى كەلۋشىلەر سانى 33،5 مىڭ ادامدى قۇرادى.
قازىرگى ۋاقىتتا اۋداندا تۇراقتى تۋريستىك كلاستەر قالىپتاستىرۋ ماقساتىندا ءتۋريزمدى دامىتۋ بويىنشا شەبەرلىك-جوسپار ازىرلەنۋدە. وبلىس اكىمى بۇل قۇجاتتى 1 قىركۇيەككە دەيىن دايىنداۋدى تاپسىردى. سونىمەن قاتار، اۋدان اۋماعىنداعى تۋريستىك ورىندار بويىنشا سانيتارلىق-گيگيەنالىق توراپتار قۇرىلىسىنا قاتىستى ۇسىنىستاردى 17 شىلدەگە دەيىن ەنگىزۋدى، ينۆەستيسيالىق جوبالار تىزبەسىن جاساپ، ولاردى ۇلتتىق جانە وڭىرلىك پۋلدارعا ەنگىزۋ جۇمىسىن جانداندىرۋدى، سونداي-اق ينۆەستيسيا تارتۋ ءىسىن كۇشەيتۋدى تاپسىردى.
«ءتۋريزمدى دامىتۋ – بۇل ينفراقۇرىلىم، جولدار، بايلانىس، قاۋىپسىزدىك، جول بويىنداعى سەرۆيس، تاماقتانۋ جانە قىزمەت كورسەتۋ ساپاسى. ءبىز بۇل ماسەلەلەردىڭ بارلىعىن جۇيەلى تۇردە شەشىپ جاتىرمىز»، – دەپ قورىتىندىلادى ءوڭىر باسشىسى.
