بۇل توپقا انەستەزيولوگ-رەانيماتولوگ، رەنتگەنولوگ، پۋلمونولوگ، دارىگەرلەر جانە جۇقپالى اۋرۋلار اۋرۋحاناسىنىڭ قىزمەتكەرلەرى كىردى.
وبلىس اكىمى دانيال احمەتوۆ ارنايى دارىگەرلەرمەن كەزدەسىپ، الداعى ماقسات پەن ەمدەۋدىڭ جولدارى تۋرالى تالقىلادى.
– شىعىس قازاقستاندا مەديسينانىڭ دامۋى ءۇشىن بارلىق جاعداي جاسالۋدا. ساتىپ الىنعان زاماناۋي تەحنيكالار ىسكە قوسىلىپ، تۇرعىندارعا قىزمەت كورسەتىپ كەلەدى. قازىرگى ىندەتتىڭ الدىن الۋ ماقساتىندا سىزدەرمەن تاجىريبە الماسىپ، جاقسى كورسەتكىشكە قول جەتكىزەمىز دەگەن سەنىمدەمىن، – دەدى دانيال احمەتوۆ.
كەلگەن ماماندار 2 كۇن ارالىعىندا اۋدان جانە قالا اۋرۋحانالارىنىڭ دارىگەرلەرىمەن ونلاين بايلانىسقا شىعىپ، كەڭەس بەرىپ، جاعدايمەن تانىسادى. كەيىننەن وسى اي سوڭىنا دەيىن ءار اۋدانعا ءبوىلىنىپ، دارىگەرلەرگە كومەكتەسەتىن بولادى.
"دارىگەرلەر توبىن تاتارستان رەسپۋبليكالىق كلينيكالىق اۋرۋحاناسى مەديسينالىق ءبولىمى باستىعىنىڭ ءبىرىنشى ورىنباسارى ميننۋلين مارسەل مانسۋر ۇلى باسقارادى، - دەدى ءىلياس مۇحامەدجانوۆ.
شىعىس قازاقستان وبلىسى دەنساۋلىق ساقتاۋ باسقارماسىنىڭ باسشىسىنىڭ پىكىرىنشە بۇل ەكى ەلدىڭ دارىگەرلەرى اراسىندا تاجىريبە الماسۋ عانا ەمەس، سونىمەن قاتار كوروناۆيرۋستىق ينفەكسيانى جەڭۋگە بىرىگىپ اتسالىسپاق. ءىلياس مۇحامەدجانوۆتىڭ ايتۋىنشا، بۇگىنگى كۇنگە دەيىن وبلىستا 4087 كوروناۆيرۋس اۋرۋى تىركەلگەن، ونىڭ ىشىندە 2126 كلينيكالىق بەلگىلەرى بار، 1961 جان سيمپتومسىز ءتۇرى.
– ايماقتارىڭىزدا كوروناۆيرۋسپەن كۇرەسۋ ءۇشىن وكپەنى جاسانجى جەلدەتۋ، وتتەگى كونسەنتراتورلارى سىندى جابدىقتار كوپتەپ ساتىپ الىنىپتى. بۇل دۇرىس شەشىم. جالپى ەكى ەلدىڭ قولدانىپ وتىرعان ادىس-تاسىلدەرى ۇقساس. الايدا سونىڭ وزىندە بىرلەسىپ جاڭا تاجىريبە جيناقتايمىز دەپ ويلايمىن، – دەدى كەلگەن توپتىڭ جەتەكشىسى، تاتارستان رەسپۋبليكاسى ورتالىق كلينيكالىق اۋرۋحاناسى باس دارىگەرىنىڭ ءبىرىنشى ورىنباسارى مارسەل ميننۋلين.
