بۇگىندە جوباعا قاتىسۋ ءۇشىن 25 بالا الدىن الا ءوتىنىم بەرگەن. جوبا بويىنشا وسكەمەندە – 12، ريددەردە – 3، شەمونايحادا – 3، گلۋبوكوەدە –4، التايدا – 3 بالا جوباعا قاتىسىپ، ءتىل سىندىراتىن بولادى.
سونىمەن قاتار، بالالارعا ولكەنىڭ تاريحىن، قازاق حالقىنىڭ سالت-داستۇرلەرىن بىلۋگە، قازاق حالىق اسپاپتارىندا ويناۋعا، جەرگىلىكتى كورىكتى جەرلەر مەن تاريحي ەسكەرتكىشتەرگە بارۋعا مۇمكىندىك بەرەتىن باعدارلاما دايىندالدى.
شقو ءبىلىم باسقارماسىنىڭ اقپاراتى بويىنشا، مازمۇندى بولىكتەن باسقا بالالاردىڭ قاۋىپسىزدىكتى قامتاماسىز ەتۋدىڭ بارلىق شارالارى قاراستىرىلعان. اۋدان اكىمدىكتەرى 20 مامىردان 1 شىلدەگە دەيىن جۇمىس ىستەيتىن ارنايى شتاب قۇراعان. شتابتىڭ مىندەتى بالالاردىڭ قوناق وتباسىندا بولعان كەزدە ءقاۋىپسىز جاعدايلارىن قامتاماسىز ەتۋ بولىپ تابىلادى.
جوباعا وسى اۋىلداردا تۇراتىن پەداگوگيكالىق كوللەدجدەر مەن جوعارى وقۋ ورىندارىنىڭ ستۋدەنتتەرى قاتارىنان ەرىكتىلەر تارتىلماقشى.
– وسى پايدالى تاجىريبەدەن وتكەننەن كەيىن جاستار بولاشاقتا ولار وزدەرىنىڭ وسىنداي جوبالاردى ۇيىمداستىرۋىنا مۇمكىندىك الادى، – دەيدى جوبانى ۇيىمداستىرۋشىلار.
جوبادا بەلگىلى ءبىر تىلدىك ءبىلىمى مەن سوزدىك قورى بار 12 جاستان 14 جاسقا دەيىنگى بالالار قاتىسادى. ءتىل ۇيرەنۋدى ماقسات تۇتقان ءاربىر بالانى قابىلدايتىن وتباسىعا 180 مىڭ تەڭگەدەن اقى تولەنەتىن بولادى.
بالالاردىڭ العاشقى لەگى بيىلعى جىلدىڭ جازىندا كاتونقاراعاي اۋدانىنىڭ قوناقجاي وتباسىلارىنا قونىستانادى. ولاردىڭ تۇرۋ ءۇشىن ءۇش اۋىل انىقتالدى. ولار – كاتونقاراعاي، ورەل جانە بەرەل.
سونىمەن قاتار، ءىس-قيمىل الگوريتمى دايىندالدى، وعان سايكەس بۇل وتباسىلار ءساۋىر ايىنىڭ سوڭىنا دەيىن مۇقيات تەكسەرۋدەن وتەدى. 12 مامىرعا دەيىن ءبىلىم ءبولىمى، بالالاردىڭ اتا-انالارى جانە قابىلداۋشى وتباسىلار اراسىندا ءۇش جاقتى شارتتار جاسالاتىن بولادى.
بارلىق بالالار قوناق وتباسىلارىنا 10-30 ماۋسىم ارالىعىندا ءبىر ۋاقىتتا بارادى.
ايتا كەتەيىك، اتا-انالار شقو ءبىلىم باسقارماسى جانىنان كولل-ورتالىعىنان بالالاردى قوناقجاي وتباسىلارىنا جىبەرۋگە قاتىستى تولىق اقپارات الا الادى.
