ايماق باسشىسى بانكتە كەم دەگەندە 1000 دوزا بولۋى كەرەكتىگىن اتاپ ءوتتى.
– ءبىز قازان ايىنداعى كوروناۆيرۋستىڭ ەكىنشى تولقىنىنا دايىن بولۋىمىز قاجەت. قازىردەن باستاپ پلازما بانكىن قۇرۋ ءۇشىن ءتيىستى جۇمىستار اتقارىلۋى ءتيىس. شىعىس قازاقستاندا 4 409 ادام كوروناۆيرۋس ينفەكسياسىمەن اۋىرىپ، جازىلىپ شىقتى. ولاردىڭ قان پلازماسى ارقىلى وزگە ناۋقاستاردىڭ اۋرۋدان ساۋىعىپ كەتۋىنە كومەكتەسە الامىز، – دەدى دانيال احمەتوۆ.
ونىڭ ايتۋىنشا، پلازما بانكىن قۇرۋعا جەدەل تۇردە كىرىسۋ كەرەك. بۇگىندە مەديسينالىق مەكەمەلەردەگى باس دارىگەرلەر مەن اكىمدەردىڭ نەگىزگى مىندەتى – حالىققا قان پلازماسىن تاپسىرۋدىڭ ماڭىزىن ءتۇسىندىرۋ.
ايتا كەتەيىك، شقو-داعى مەديسينالىق مەكەمەلەر ۇزدىك تەحنيكالىق جابدىقتارمەن قامتاماسىز ەتىلگەن. 27 اۋرۋحانا، ونىڭ باسىم بولىگى اۋداندىق اۋرۋحانالارىڭ ءارقايسىسىندا ورتاشا ەسەپپەن 5 كونسەنتراتور بار.
– شىعىسقازاقستاندىق دارىگەرلەرگە COVID-19 ينفەكسياسىمەن كۇرەسۋدەگى تاجىريبەلەرىمەن بولىسكەن تاتارستان رەسپۋبليكاسىنىڭ مەديسينا قىزمەتكەرلەرى وڭىردەگى ستاسيونارلاردىڭ مەديسينالىق پرەپاراتتارمەن جابدىقتالۋىنا وڭ باعا بەردى، – دەلىنگەن حابارلامادا.
دانيال احمەتوۆ وبلىستىڭ ماۋسىمدىق اۋرۋلارعا دايىن ەكەنىن اتاپ ءوتتى. ماسەلەن، تۇماۋعا قارسى ۆاكسينا ەگۋ جۇمىستارىنا دايىندىق جۇرگىزىلۋدە. مەديسينالىق مەكەمەلەرگە 20 000 ۆاكسينا جەتكىزۋ جوسپارلانۋدا. ۆاكسينا مۇقتاج جاندارعا تەگىن سالىنادى.
