قما شىعىس قازاقستان وبلىسى بويىنشا دەپارتامەنتى «تازا وسكەمەن» شارۋاشىلىق جۇرگىزۋ قۇقىعىنداعى كوممۋنالدىق مەملەكەتتىك كاسىپورنىنىڭ بۇرىنعى باسشىلىعىنا قاتىستى قالا كوشەلەرىن كۇتىپ-ۇستاۋعا بولىنگەن بيۋدجەت قاراجاتىن جىمقىرۋ دەرەگى بويىنشا سوتقا دەيىنگى تەرگەپ-تەكسەرۋدى جۇرگىزۋدە، دەپ حابارلايدى Dalanews.kz.

كۇدىكتىلەردىڭ اراسىندا كاسىپورىننىڭ بۇرىنعى ديرەكتورى، ونىڭ ورىنباسارى جانە جەكە كاسىپكەر بار.

لاۋازىمدىق وكىلەتتىكتەرىن پايدالانا وتىرىپ، كۇدىكتىلەر 2022-2023 جىلدار ارالىعىندا مەملەكەتتىك ساتىپ الۋ راسىمدەرىن وتكىزبەستەن، جۇيەلى تۇردە بيۋدجەت قاراجاتىن وزدەرىمەن بايلانىسى بار كوممەرسيالىق قۇرىلىمداردىڭ ەسەپشوتتارىنا زاڭسىز اۋدارىپ وتىرعان.

قىلمىستىق سحەمانىڭ ءمانى – ماتەريالداردى جەتكىزۋ جانە تەحنيكانى جالعا الۋ بويىنشا جالعان قۇجاتتار راسىمدەۋدە بولعان.

اتاپ ايتقاندا، قۇجاتتاردا جولداردى جوندەۋگە ارنالعان بيتۋم مەن قۇم ساتىپ الۋ، سۋدى سورۋعا ارنالعان ارنايى تەحنيكا جالداۋ، سونداي-اق بۇعان دەيىن ورناتىلعان 23 ايالداما پاۆيلونىن جاساۋعا قاجەتتى ماتەريالدار ساتىپ الۋ تۋرالى جالعان دەرەكتەر كورسەتىلگەن.

كەيىن بۇل قاراجات جەكە كاسىپكەر ارقىلى قولما-قول اقشاعا اينالدىرىلىپ، سحەماعا قاتىسۋشىلار اراسىندا بولىنگەن.

كەلتىرىلگەن زالالدىڭ جالپى سوماسى 120 ملن تەڭگەدەن استى.

قىلمىستىق جولمەن الىنعان تابىسقا كۇدىكتىلەر وسكەمەن قالاسىنداعى قىمبات تۇرعىن ءۇي كەشەنىنەن پاتەر، «BMW X6M» جانە «Subaru Forester» اۆتوكولىكتەرىن، سونداي-اق جەر ۋچاسكەلەرىن ساتىپ العان. اتالعان مۇلىككە سوت سانكسياسىمەن تىيىم سالىندى.

كاسىپورىننىڭ بۇرىنعى ديرەكتورىنا قاتىستى بۇلتارتپاۋ شاراسى رەتىندە ەكى اي مەرزىمگە قاماۋعا الۋ تۇرىندەگى شارا قولدانىلدى.

تەرگەۋ جالعاسۋدا.

قازاقستان رەسپۋبليكاسىنىڭ قىلمىستىق-پروسەسسۋالدىق كودەكسىنىڭ 201-بابىنا سايكەس وزگە اقپارات جاريا ەتىلۋگە جاتپايدى.