وتكەن جىلى وبلىس اۋماعىندا 314 ءدىني بىرلەستىكتەر مەن ولاردىڭ فيليالدارى: يسلام، پراۆوسلاۆيە، كاتوليسيزم، پروتەستانتيزم، "يەگوۆا كۋاگەرلەرى" قاۋىمداستىعى، كريشنا جانە يۋدەي پريحودتارى ءدىني قىزمەتىن جۇزەگە اسىردى. ميسسيونەرلەر سانى 6 ادامدى قۇرادى.
– شىعىس قازاقستان وبلىسىنىڭ اكىمدىگى ءدىني بىرلەستىكتەرمەن ءوزارا ءىس-قيمىلدى تۇراقتى نەگىزدە جۇزەگە اسىرادى. وبلىس اكىمدىگىنىڭ، سونداي-اق، قالالار مەن اۋداندار اكىمدىكتەرىنىڭ جانىندا ءدىني بىرلەستىكتەرمەن بايلانىس جونىندەگى كەڭەستەر جۇمىس ىستەيدى. ولار مەملەكەتتىك ورگانداردىڭ ءتۇرلى كونفەسسيالارمەن ءوزارا ءىس-قيمىلى ءۇشىن ديالوگ الاڭى بولىپ تابىلادى. سونىمەن قاتار، وبلىستىڭ ءدىني بىرلەستىكتەر باسشىلارى كلۋبى جۇمىس ىستەيدى. كونفەسسياارالىق كەلىسىمدى نىعايتۋ ءۇشىن ءدىني مەرەكەلەردىڭ الەۋەتى پايدالانىلادى، – دەدى اسقار يسابايەۆ.
سونىمەن قاتار، ءدىني بىرلەستىكتەرمەن بىرلەسىپ قايىرىمدىلىق اكسيالارى، ەكولوگيالىق سەنبىلىكتەر، سپورتتىق جارىستار وتكىزىلەدى. ءار ءتۇرلى كونفەسسيالاردىڭ وكىلدەرى بىر-بىرىنە كەلىپ، قارىم-قاتىناس جاساپ، ءدىني بىرلەستىكتىڭ تاريحىمەن، مادەنيەتىمەن جانە قىزمەتىمەن تانىسادى. سوعان قوسا، اشىق ەسىك كۇندەرىن وتكىزۋ سياقتى كرەاتيۆتى فورما قولدانىلادى.
– 2020 جىلى شىعىس قازاقستانداعى ءدىني احۋالدى جانە ءاقپاراتتىق-تۇسىندىرۋ توپتارى قىزمەتىنىڭ تيىمدىلىگىن باعالاۋ بويىنشا جۇرگىزىلگەن الەۋمەتتىك زەرتتەۋلەردىڭ ناتيجەلەرى ءدىن سالاسىنداعى مەملەكەتتىك ساياساتتى قولداۋشىلاردىڭ ۇلەسى 87،1%-دى قۇراعانىن كورسەتىپ وتىر، – دەپ اتاپ ءوتتى سپيكەر.
سونداي-اق، باسقارمانىڭ مالىمەتىنە سايكەس، وڭىردەگى ءدىني احۋالدى قولايلى دەپ باعالاۋشىلاردىڭ ۇلەسى 88،2%-دى قۇراعانىن ايتا كەتكەن ءجون.
