بۇگىندە شقو-دا 363 ەلدى مەكەن بار. سونىڭ 171ء-نىڭ باس جوسپارلارى، دامۋ جانە قۇرىلىس سحەمالارى بار بولسا، ال 192 اۋىلدىق ەلدى مەكەن بويىنشا قالا قۇرىلىسى قۇجاتتاماسى جوق ەكەنى باسپا ءسوز ماسليحاتىندا بەلگىلى بولدى.
بۇل ءوز كەزەگىندە جەر قاتىناستارى، ساۋلەت جانە قالا قۇرىلىسى سالاسىندا مەملەكەتتىك قىزمەتتەر كورسەتۋ، ەلدى مەكەننىڭ توپوگرافيالىق كەزەكشى جوسپارىن جۇرگىزۋ كەزىندە پروبلەمالار تۋعىزاتىنىن باسقارما باسشىسى العا تارتتى.
– 2022 جىلعى 24 اقپاندا وبلىس اكىمدىگىنىڭ قاۋلىسىمەن وبلىس ەلدى مەكەندەردىڭ باس جوسپارلارىن، دامۋ جانە قۇرىلىس سىزبالارىن، ازىرلەۋ جانە تۇزەتۋ جونىندەگى جول كارتاسى قابىلداندى، وعان سايكەس وبلىس اكىمدىگىنىڭ 2023 جىلعى 21 اقپانداعى قاۋلىسىنا سايكەس وزگەرىستەرمەن 2025 جىلعا دەيىن 163 پەرسپەكتيۆالى جانە ماڭىزدى ەلدى مەكەندەردىڭ باس جوسپارلارىن دامىتۋ جانە تۇزەتۋ، سىزبالارىن ازىرلەۋ جوسپارلانعان، – دەدى نادەجدا ميحەيليس.
2023 جىلى بەكىتىلگەن جول كارتاسىنا سايكەس ەلدى مەكەندەردىڭ 46 باس جوسپارىن ازىرلەۋ مىندەتى تۇر.
وبلىس بويىنشا وسكەمەن جانە زايسان قالالارىندا جاڭارتىلعان باس جوسپارى بار، ال ريددەر، التاي، سەرەبريانسك، شەمونايحا بويىنشا تۇزەتۋلەر قاجەت ەتەتىنىن بريفينگتە سپيكەر ايتىپ ءوتتى.
«مەملەكەتتىك قىزمەتتەر كورسەتۋدىڭ جاڭا ءتارتىبى مەن قالا قۇرىلىسى جوبالارىن ازىرلەۋ، تۇزەتۋ وبلىس قالالارىنىڭ رەتسىز، نۇكتەلى جانە تىعىز قۇرىلىستارىنا جول بەرمەۋدى قامتاماسىز ەتەدى» دەدى شقو جەر قاتىناستارى باسقارماسىنىڭ باسشىسى نادەجدا ميحەيليس.
