جيىندى «سۋ رەسۋرستارى–ماركەتينگ» ج ش س باس ديرەكتورى اناربەك ورمان اشىپ، ءالعىسوزدى شىمكەنت قالالىق قوعامدىق كەڭەستىڭ جانە قالالىق كاسىپوداقتار بىرلەستىگىنىڭ ءتوراعاسى باۋىرجان التەيەۆكە بەردى.
باۋىرجان ىلىمشە ۇلى پرەزيدەنت جولداۋىندا كوتەرىلگەن قوعامداعى دەموكراتيا، جاڭا ەكونوميكالىق ساياسات، اۋىل شارۋاشىلىعىنىڭ جاڭا سەكتورلارىن دامىتۋ، زاڭناما جۇيەسىن جاڭعىرتۋ سياقتى وزەكتى تاقىرىپتارعا توقتالدى.
– بۇل جولداۋ قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ بويىنشا بيىلعى 5 ماۋسىمدا وتكەن رەسپۋبليكالىق رەفەرەندۋمنىڭ جالعاسى ىسپەتتى بولدى.
ول ساياسي وقيعانىڭ الدىندا وتە اۋقىمدى ءتۇسىندىرۋ جۇمىستارى جۇرگىزىلىپ، اتا زاڭعا ەنگىزىلگەن وزگەرىستەردىڭ ناتيجەسىندە جاڭا مەملەكەتتىك باسقارۋ مودەلىنە، بيلىك پەن قوعامنىڭ ءوزارا بايلانىسىنىڭ جاڭا فورماتىنا اۋىسى باستالدى.
مەملەكەت باسشىسىنىڭ جولداۋىندا، سونىمەن قاتار، زاڭ مەن ءتارتىپ، باسقارۋ جۇيەسىن قايتا قۇرۋ، سوت جۇيەسىنىڭ رەفورماسى سەكىلدى تاقىرىپتار كوتەرىلدى.
سەبەبى، ەسكى جۇيەنىڭ مەرزىمى ءوتتى، قازىرگى تاڭداعى قولدانىسقا ساي ەمەس. سول ءۇشىن حالىق اراسىندا ۇنەمى اقپاراتتىق-ناسيحات جۇمىسى جۇرگىزىلۋى كەرەك. كوبىسى جوعارى سوتتان كەيىن شاعىمداناتىن ورىن جوق دەپ سانايدى. ولاي ەمەس، ءبىزدىڭ ەلىمىزدە كونستيتۋسيالىق سوت بار، – دەدى باۋىرجان ىلىمشە ۇلى.
جيىندا قوعامدىق كەڭەستىڭ مۇشەلەرى ابدۋللا احمەتوۆ، يسمايل شالابايەۆ، ەربول جولبارىسوۆ جانە باسقا دا سپيكەرلەر جولداۋدا كوتەرىلگەن تەك ساياسي عانا ەمەس، ەكونوميكالىق ماسەلەلەرگە، پرەزيدەنت بەرگەن تاپسىرمالارعا توقتالىپ ءوتتى.
ولاردىڭ ايتۋىنشا، بۇگىندە مەملەكەتىمىز دەموكراتيانىڭ داڭعىل جولىنا ءتۇسىپ، ەلىمىزدە الەۋمەتتىك سالاعا دا باسا نازار اۋدارىلۋدا.
كەزدەسۋدە جەر قاتىناستارى، سالىق جۇيەسىندەگى جاڭاشىلدىقتار دا ءسوز بولدى. باۋىرجان التەيەۆتىڭ ايتۋىنشا، شاعىن جانە ورتا بيزنەسكە سالىق سالۋعا ديففەرەنسيالى تۇردە كەلۋ كەرەك. جاقسى جۇمىس ىستەپ، ەل ەكونوميكاسىنا ۇلەس قوسىپ جۇرگەن، تابىس تاۋىپ، قىزمەتكەرلەرىنە جاقسى جالاقى تولەيتىن كاسىپكەرلىك نىساندارىنا جەڭىلدىك بەرگەن دۇرىس دەپ سانايدى قوعامدىق كەڭەس مۇشەسى. سپيكەر ءتيىمدى ءارى زاڭ تالابىن مۇلتىكسىز ورىندايتىن كاسىپكەرلەرگە يندۋستريالدى ايماقتارداعى جەر ۋچاسكەلەرىنىڭ ءبىر بولىگىن جەكە مەنشىككە دە بەرۋگە بولادى دەيدى.
– مەملەكەتىمىزدىڭ باستى قۇندىلىعى – ادام جانە ونىڭ ءومىرى. دەگەنمەن، وكىنىشكە قاراي، بۇگىنگى تاڭدا دەنساۋلىق ساقتاۋ قىزمەتى كورسەتىلمەيتىن اۋىلدار دا بار. الداعى 2-3 جىلدا بىزگە فەلشەرلىك-اكۋشەرلىك پۋنكتتەر قۇرىپ، اۋىلداعى اعايىن الىسقا ساندالمايتىنداي جاعداي جاساۋ كەرەك، – دەدى باۋىرجان التەيەۆ.
جيىندا ەلىمىزدەگى ەڭ تومەنگى جالاقى مولشەرى دە تالقىلاندى. ايتقانداي، ونىڭ كولەمى 2023 جىلى 70 مىڭ تەڭگە بولادى. جانە مۇنىمەن توقتامايدى دەستى.
ال اناربەك ورمان شاعىن جانە ورتا بيزنەسكە مەملەكەت تاراپىنان كورسەتىلەتىن قولداۋ ارتا تۇسسە دەگەن نيەتىن جەتكىزدى.
– بۇلاي وتە دۇرىس بولار ەدى. مىسالى، اناربەك ورمان – ءوز جۇمىسكەرلەرىنىڭ الەۋمەتتىك قۇقىقتارىن ۇنەمى قورعاپ جۇرەتىن جۇمىس بەرۋشى. ول باسقاراتىن جاۋاپكەرشىلىگى شەكتەۋلى سەرىكتەستىك قالالىق كاسىپوداق بىرلەستىگىنىڭ قۇرامىنا ەنەدى. جانە ءبىز قاتارىمىزدا وسىنداي مەكەمە بار ەكەنىن ماقتان تۇتامىز، – دەدى باۋىرجان التەيەۆ.
«شىمكەنت كەلبەتى»
