شىمكەنت قالاسىندا جەلدىڭ كۇشى سەكۋندىنا 15-20 مەترگە دەيىن جەتتى. قولايسىز اۋا رايىنىڭ سالدارىنان قالاداعى ءنۇرسات، تاراز، سولتۇستىك - شىعىس شاعىن اۋداندارىندا ەلەكتر قۋاتى اپاتتى وشكەن بولاتىن. كەي كوشەلەردە باعدارشامدار جۇمىس ىستەمەي قالدى، – دەپ حابارلايدى Dalanews.kz شىمكەنت قالاسى اكىمدىگىنىڭ باسپا ءسوز قىزمەتىنە سىلتەمە جاساپ.

بۇگىن ساعات 07:15-تە «ۆوستوچنايا» 110/10 كۆ قوسالقى ستانسياسىنان  27 ۇياشىقتان شىعاتىن 10 كۆ اۋە جەلىسىندە قاتتى جەل سالدارىنان يزولياتور ورنىنان شىعىپ كەتىپ، جەلىلەر ايقاسۋى ورىن الدى.

وسىنىڭ سالدارىنان ەلەكتر قۋاتى اپاتتى ءوشىپ، باسقا جەلىگە اۋىستىرۋ جۇمىستارىنان سوڭ ءنۇرسات شاعىن اۋدانىنا ەلەكتر قۋاتى بەرىلدى. قالعان 2 شاعىن اۋداندى ەلەكتر قۋاتىنا قوسۋ ءۇشىن باسقا جەلىگە اۋىستىرۋ جۇمىستارى جۇرگىزىلۋدە.

شىمكەنت قالالىق ەنەرگەتيكا جانە كوممۋنالدىق شارۋاشىلىعى باسقارماسىنىڭ ماماندارى قالا تۇرعىندارىنان ازداپ كەلتىرىلگەن قولايسىزدىقتار ءۇشىن كەشىرىم سۇراپ، ەلەكتر قۋاتىن رەتكە كەلتىرۋ ءۇشىن ارنايى بريگادا جۇمىلدىرىلىپ، ءتيىستى جۇمىستار جۇرگىزىلىپ جاتقانىن باياندادى.