شىمكەنت قالاسىنىڭ اۋماعىندا كريپتوۆاليۋتا ءوندىرۋ بويىنشا زاڭسىز ماينينگ فەرماسىن ۇيىمداستىرعان ەكى ازاماتتىڭ قىلمىستىق ىس-ارەكەتى اشكەرەلەندى، دەپ حابارلايدى Dalanews.kz.

قارجىلىق مونيتورينگ اگەنتتىگى باسپا ءسوز قىزمەتىنىڭ مالىمەتىنشە، 2023 جىلعى ءساۋىر مەن 2024 جىلعى اقپان ارالىعىندا اتالعان تۇلعالار جالپى سوماسى 100 ملن تەڭگەدەن استام اسا ءىرى مولشەردە كىرىس الا وتىرىپ، ماينينگتىك فەرما ۇيىمداستىرعانى انىقتالدى.

"ولاردىڭ جالپى سوماسى 370 ملن تەڭگە بولاتىن 1000 دانا ASIC ماينەرلەر (بيتكوين ءوندىرۋ جابدىعى) مەن زاڭسىز وندىرىلگەن سيفرلىق اكتيۆتەر (بيتكويندار) تۇرىندەگى مۇلكى تاركىلەنىپ، ءبىرى ەكى جىلعا، ەكىنىشىسى 2،5 جىلعا باس بوستاندىعىنان ايىرىلدى"، دەلىنگەن 9 قازانداعى اگەنتتىك حابارلاماسىندا.

جالپى، اعىمداعى جىلدىڭ باسىنان بەرى قىلمىستىق تابىسى 400 ملن تەڭگەگە جۋىق زاڭسىز ماينينگتىك فەرمالاردى ۇيىمداستىرۋدىڭ 4 فاكتىسى انىقتالدى.

قارجىلىق مونيتورينگ اگەنتتىگى اتالعان قىزمەت تۇرىنە ءتيىستى ليسەنزيا بولعان جاعدايدا عانا رۇقسات ەتىلگەنىن ەسكەرتەدى.