اكىم قولعا الىناتىن شارالار الەۋمەتتىك ينفراقۇرىلىمى ساقتالعان 13 ەلدى مەكەنگە قاتىستى ەكەنىن تىلگە تيەك ەتتى. بۇل رەتتە اۋىل تۇرعىندارى ورتا جانە مەكتەپكە دەيىنگى ءبىلىم بەرۋ، دەنساۋلىق ساقتاۋ، مادەنيەت جانە سپورت قىزمەتتەرىمەن قامتاماسىز ەتىلگەن. الايدا، ولاردى قارجىلاندىرۋ قازىرگى اۋدان ورتالىقتارىنا قاراعاندا ەداۋىر از ەكەنىن اتاپ وتكەن ءجون. بۇدان باسقا، تۇرعىن ۇي-كوممۋنالدىق سالادا، سونداي-اق جول ينفراقۇرىلىمىندا پروبلەمالار بار.
– بارلىق بۇرىنعى اۋدان ورتالىقتارى كوشەلەرىنىڭ 44%-ى عانا جاقسى جانە قاناعاتتانارلىق جاعدايدا. قاينار، بوزانباي، بارشاتاس اۋىلدارىنداعى، سەرەبريانسك قالاسىنداعى جولداردىڭ جاعدايى ناشار. حالىقتى سۋمەن جابدىقتاۋدىڭ تومەن دەڭگەيى ماقانشى جانە بوزانباي اۋىلدارىندا بايقالادى. سونداي-اق، بۇرىنعى اۋدان ورتالىقتارىندا رەكرەاسيالىق جانە سپورتتىق قۇرىلىستار جەلىسى ناشار دامىعان. تۇرعىن ءۇي قۇرىلىسىن جانداندىرۋ قاجەت. كەزەكتە 722 ادام تۇر، ولاردىڭ كوپشىلىگى سەرەبريانسك قالاسىندا – 153، ماقانشى اۋىلىندا – 109 جانە ساماردا 94 ادام. ءبىزدىڭ مىندەتىمىز – جاقىن ماڭداعى اۋىلداردان حالىقتى تارتا وتىرىپ، بۇرىنعى اۋدان ورتالىقتارىن دامىتۋعا باسا نازار اۋدارۋ، ناقتى سەكتوردىڭ ءوسۋى جانە جاڭا جۇمىس ورىندارىن قۇرۋ ءۇشىن جاعداي جاساۋ. ول ءۇشىن اۋدان اكىمدەرى مەن سەمەي قالاسىنىڭ اكىمىنە ەكونوميكا باسقارماسىمەن بىرلەسىپ، بۇرىنعى اۋدان ورتالىقتارىن الداعى ءۇش جىلعا دامىتۋ باعدارلاماسىن جاساۋدى تاپسىرامىن، – دەدى دانيال احمەتوۆ.
وبلىس اكىمى شقو اۋماعىن ۆەكتورلىق دامىتۋدا 5 شەكارالاس اۋدان بويىنشا تاجىريبە بار ەكەنىن ايتتى. حالىقتىڭ ءومىر ءسۇرۋ ساپاسىن جاقسارتۋعا باعىتتالعان كەشەندى جوسپاردىڭ ارقاسىندا بىلتىر كۇرشىم جانە ءۇرجار اۋىلدارىندا 2 ءجۇزۋ باسسەينى، ماقانشى اۋىلىندا سپورت ءمودۋلى سالىندى. 17 ەكىپاتەرلى تۇرعىن ءۇي پايدالانۋعا بەرىلىپ، 3 كوپپاتەرلى ءۇيدىڭ قۇرىلىسى باستالدى، 105 ءبىلىم بەرۋ، 6 – دەنساۋلىق ساقتاۋ، 9 – سپورت، 31 – مادەنيەت نىساندارى، 270 كم-دەن استام جولدار مەن كوشەلەر جوندەلدى.
تارباعاتاي، كۇرشىم جانە ءۇرجار اۋداندارىنىڭ اۋىلدارىنا سۋمەن جابدىقتاۋ جەلىلەرى تارتىلدى، 18 ەلدى مەكەندە بلوكتى-مودۋلدى ستانسيالار ورناتىلدى. شەكارا ماڭىنداعى اۋداندار اۋرۋحانالارىنىڭ پەرزەنتحانا بولىمشەلەرىن 2 دەڭگەيگە اۋىستىرۋ ءۇشىن 989 ملن.تەڭگەگە مەديسينالىق جابدىقتار ساتىپ الىندى.
اعىمداعى جىلى 4 كوپپاتەرلى تۇرعىن ءۇي، 8 سۋ قۇبىرى، 4 دەنە شىنىقتىرۋ-ساۋىقتىرۋ كەشەنى، 2 سپورتتىق مودۋل، 3 مادەنيەت نىسانىنىڭ قۇرىلىسى جوسپارلانعان. 39 الەۋمەتتىك سالا نىساندارىن، 12 سۋ قۇبىرىن جانە 230 كم استام جولدار مەن كوشەلەردى جوندەۋ قاراستىرىلعان.
