شەتەلدىك ينتەرنەت-دۇكەندەر ارقىلى كەلەتىن تاۋارلارعا سالىق سالۋ كوزدەلىپ وتىر. بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى سەرىك جۇمانعارين مالىمدەدى، دەپ حابارلايدى Dalanews.kz.

“ەلەكتروندىق ساۋدا وپەراتورىن قۇرۋدىڭ باستى ماقساتى – شەتەلدىك ينتەرنەت-دۇكەندەر ارقىلى كەلەتىن تاۋارلارعا باقىلاۋ ورناتىپ، ناقتى ستاتيستيكا جۇرگىزۋ. قازىرگى تاڭدا ونداي ستاتيستيكا جوق، سەبەبى بۇل تاۋارلار جەكە پايدالانۋعا ارنالعان دەپ ەسەپتەلەدى. ءبىراق ءبىز ولاردىڭ ناقتى كولەمىن ءبىلۋىمىز كەرەك”، – دەدى مينيستر.

ونىڭ ايتۋىنشا، جاڭا جۇيە ارقىلى دەكلاراسيا تاپشىلىعى ماسەلەسى دە شەشىلەدى.

“بۇگىندە دەكلاراسيالاۋ مىندەتى – دەكلارانتتىڭ موينىندا. ال جاڭا جۇيە ەنگىزىلگەن سوڭ، بۇل فۋنكسيا ەلەكتروندىق ساۋدا وپەراتورىنا جۇكتەلەدى. ەگەر زاڭ بۇزىلسا، مىسالى، جالعان دەكلاراسيا تولتىرىلسا، جاۋاپكەرشىلىك وسى وپەراتورعا ارتىلادى”، – دەدى ول.

سونداي-اق جۇمانعارين دەكلاراسيا ءۇشىن بەلگىلەنەتىن تولەمدەر تۋرالى دا ايتتى.

“ءبىز تورت-بەس مىڭ دەكلاراسياعا ەسەپتەلەتىن تولەم كولەمىن جوسپارلاپ وتىرمىز. بۇل – وپەراتوردىڭ قىزمەتىنە بايلانىستى تولەم. باسقا ەشقانداي تولەم كوزدەلمەگەن”، – دەدى ول.

ءمينيستردىڭ ايتۋىنشا، شەتەلدەن جەكە ماقساتتا تاۋار الۋعا قاتىستى بۇرىنعى جەڭىلدىكتەر ساقتالادى.

“ءقازىر دە، ەرتەڭ دە، ەگەر تاۋاردىڭ باعاسى 200 ەۋرودان، سالماعى 31 كيلوگراممنان اسپاسا، دەكلاراسيا تەگىن جاسالادى. جەكە تۇلعالار ەشقانداي اقشا تولەمەيدى. ءبىراق دەكلاراسيا مىندەتتى تۇردە جاسالۋى كەرەك – بۇل ەسەپ جۇرگىزۋ ءۇشىن قاجەت”، – دەدى مينيستر.

ول قوسىمشا قۇن سالىعى (ققس) مولشەرىنە دە توقتالدى.

“بۇرىن ققس مولشەرى 12 پايىز بولسا، ەندى ول 16 پايىز بولادى. ەگەر تاۋار 200 ەۋرودان اسسا، ققس-قا قوسىمشا تاعى 5 پايىز كەدەندىك باج سالىعى الىنادى. ياعني بارلىعى 17 پايىزدى قۇرايدى. قازىرگى ۋاقىتتا بۇل كورسەتكىش 15 پايىز”، – دەدى جۇمانعارين.

ءمينيستردىڭ ايتۋىنشا، مۇنداي وزگەرىستەر سالىقتىق ادىلەتتىلىك پەن ينتەرنەت ارقىلى كەلەتىن تاۋارلار اعىنىن رەتتەۋ ءۇشىن قاجەت.