ەلىمىزدە شەتەلدىك جۇمىسشىلار تارتۋ كۆوتاسى 40 پايىزعا قىسقاردى دەپ حابارلايدى Dalanews.kz.
ەڭبەك جانە الەۋمەتتىك قورعاۋ ءمينيسترى ءبىرجان نۇرىمبەتوۆتىڭ ايتۋىنشا شەتەلدىك جۇمىس كۇشىن تارتۋ كۆوتاسى بيىل 29 مىڭ ادامنان اسپاۋى ءتيىس. بىلتىر بۇل كورسەتكىش 49 مىڭ بىرلىكتى قۇراعان بولاتىن.
“29 مىڭ بىرلىك – شەكتى دەڭگەي. ەلدەگى شەتەلدىك جۇمىسشى سانى وسى مەجەدەن اسپاۋى ءتيىس.
1 تامىزعا دەيىن كومپانيالار جەرگىلىكتى اتقارۋشى ورگانىنا بيىلدىققا قانشا شەتەلدىك ماماندى جۇمىسقا تارتاتىنىن حابارلاۋى ءتيىس.
جەرگىلىكتى اتقارۋشى ورگاندار زاڭعا ساي شەشىم قابىلداۋ، الگى كومپانيالاردىڭ ءوتىنىشىن ءبىزدىڭ مينيسترلىككە جىبەرەدى، – دەيدى ەڭبەك جانە الەۋمەتتىك قورعاۋ ءمينيسترى.
اتالعان ماسەلە بۇدان بۇرىن توقايەۆتىڭ باستاماسىمەن قۇرىلعان ۇلتتىق قوعامدىڭ كەڭەستىڭ وتىرىسىندا ايتىلعان.
كەڭەس مۇشەسى، قوعام بەلسەندىسى جانىبەك قوجىق جۇمىسسىزدىق ماسەلەسىن جانە ونى ازايتۋدىڭ جولدارى تۋرالى ماسەلە كوتەرگەن ەدى.
"مەن اۋىلدا تۇرامىن، اۋىل حالقىنىڭ ەڭ باستى ماسەلەسى - جۇمىسسىزدىق. جاستار جۇمىس ىزدەپ قالاعا كوشۋدە، سوعان قاراعاندا قالانىڭ جاعدايى، اۋىلعا قاراعاندا شۇكىر بولار دەپ ويلايمىن"، - دەپ جازادى جانىبەك قوجىق الەۋمەتتىك جەلىدە.
«ەڭ باستىسى، شەتەلدەن كەلەتىن جۇمىسشىلارعا بەرىلەتىن كۆوتانىڭ سانىن قىسقارتۋ، زاڭسىز كەلگەندەرىن ەلدەن شىعارۋ، ولاردىڭ ورنىنا جۇمىسسىز جۇرگەن جاستاردى جۇمىسقا قابىلداۋدى سۇراعان بولاتىنمىن.
شەتەلدىك جۇمىس كۇشىنە كۆوتا قىسقارسا، ەلدەگى جۇمىسسىزدار سانى دا ازايادى.
ۇلتتىق كەڭەستىڭ 20 جەلتوقسانداعى وتكەن ەكىنشى وتىرىسىندا مەملەكەت باسشىسى قاسىم-جومارت توقايەۆ شەتەلدەن كەلەتىن جۇمىسشىلارعا بەرىلەتىن كۆوتانىڭ سانىن قىسقارتىپ، ولارعا قويىلاتىن تالاپتاردى كۇشەيتىپ، بۇل جاعدايدى قاتاڭ باقىلاۋعا الاتىنىن ايتتى»، - دەيدى ول.
جانىبەك قوجىقتىڭ ويىنشا، سول قىسقارعان شەتەلدىك جۇمىسشىلاردىڭ ورنىنا جۇمىسسىز جۇرگەن مىڭداعان جاستار جۇمىسقا كىرەتىن بولادى.
«بۇل تەڭىزگە تامعان تامشىداي بولسا دا ەلگە تيگەن پايدا عوي. سوندىقتان دا ۇلتتىق كەڭەسكە كىرگەنىم ءۇشىن، ازىرگە، وكىنبەيمىن. مۇمكىندىگىڭ بولىپ تۇرعاندا ۇلتتىق كەڭەستى ەلدىڭ مۇددەسىنە نەگە پايدالانباسقا، نەگە ەلدىڭ اماناتىن بيلىككە تۋرا ايتپاسقا؟! الدە دە تالاي ايتار ۇسىنىستارىم، ماڭىزدى ماسەلەلەرىم بار»،-دەپ جازادى قوعام بەلسەندىسى.
