"وسى وقيعا بايلانىستى ايتار بولساق، ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ شەتەلدىك وقۋ ورىندارىنا جاستارىمىزدىڭ باقىلاۋسىز شىعىپ كەتۋ ماسەلەسىن بىرنەشە رەت كوتەرگەن بولاتىن"، − دەيدى ق ر ءدىن ىستەرى جانە ازاماتتىق قوعام ءمينيسترىنىڭ كەڭەسشىسى باقىتجان قۇلەكەيەۆ.
ونىڭ ايتۋىنشا، شەتەلگە ءدىني ءبىلىم الۋ ماقساتىندا بارعان جاستارىمىز راديكالدى ءدىني اعىمدار يدەولوگتارىنىڭ ىقپالىنا تۇسەدى. بۇل قازاقستاندىقتاردىڭ شەتەلدەگى ءدىني وقۋ ورىندارىنا بارۋى رەتتەلمەگەندىكتەن بولىپ وتىر. بۇگىنگى تاڭدا 300-گە جۋىق ازاماتىمىز شەتەلدە وسىنداي جاعدايدا ءبىلىم الۋدا، كوبەنەسە ولار ەگيپەت پەن ساۋد ارابياسىندا وقيدى. وتانداستارىمىزدىڭ ءبىر بولىگى ءتۇسىندىرۋ جۇمىستارىننىڭ ناتيجەسىندە ەلگە ورالدى.
"اتالعان مەملەكەتتەردە احۋال بۇگىنگى تاڭدا كۇردەلى ەكەندىگىن ءتۇسىنۋ قاجەت. ول جاقتا تەرروريزمگە قارسى جانە جالپى كوشى-قون ءتارتىبى كۇشەيتىلدى. وسىعان بايلانىستى ەگەر راديكالدى اعىمداردىڭ جاقتاۋشىسى بولماساڭىز دا، ماركاز دەپ اتالاتىن كۇماندى وقۋ ورتالىقتارىندا، ءدىني نەمەسە تىلدىك كۋرستاردا وقيتىن بولساڭىز، جەرگىلىكتى ارنايى ورگاندار مەن پوليسيانىڭ نازارىنا دەرەۋ ىلىگەسىز"، − دەپ باسا ايتتى قۇلەكەيەۆ.
وسىعان بايلانىستى، مينيسترلىك اتا-انالارعا بالالارىن وسىنداي وقۋ ورىندارىنا جىبەرمەس بۇرىن ويلانىپ، بارلىعىن اقىلعا سالۋعا كەڭەس بەرەدى.
"وزىمىزدە وقۋ ورىندارى جەتكىلىكتى. مىسالى، الماتىداعى "نۇر-مۇباراك" ۋنيۆەرسيتەتى مەن ەلىمىزدە مەدرەسەلەر جۇيەسى بار. سونداي-اق، نەلىكتەن ءتيىستى ماماندىق الىپ، بولاشاقتا تابىس كوزىن تابا الاتىن باسقا دا ءبىلىم الۋدى ويلاماسقا"، − دەيدى ءمينيستردىڭ كەڭەسشىسى.
ول قازاقستان مۇسىلماندارى ءدىني باسقارماسىنىڭ بۇدان بىلاي شەتەلدە كەلىسىمسىز ءبىلىم الىپ كەلگەن ازاماتتاردى جۇمىسقا قابىلدامايتىنىن ەسكە سالىپ ءوتتى.
ونىڭ ايتۋىنشا، قازىرگى ۋاقىتتا ءدىني قىزمەت تۋرالى زاڭناما جوباسى ازىرلەنىپ جاتىر. وسى جۇمىس شەڭبەرىندە شەتەلدە تەولوگيالىق ءبىلىم الۋمەن بايلانىستى قوعامدىق قاتىناستاردى رەتتەيتىن نورما ۇسىنىلاتىن بولادى.
"بىرنەشە نۇسقا بار. ءبىز ولاردى باسقا ۆەدومستۆولاردىڭ ساراپشىلارىمەن تالقىلاۋ ۇستىندەمىز. ولاردىڭ ءبىرى قازاقستاندا باكالاۆريات دەڭگەيىندە جوعارعى ءدىني ءبىلىم العاننان كەيىن جانە تىركەلگەن ءدىني بىرلەستىكتەردىڭ جولدامالارى بويىنشا عانا شەتەل مەملەكەتتەرىندە رۋحاني (ءدىني) ءبىلىم الۋدى قاراستىرادى. ماگيستراتۋرا جانە دوكتورانتۋرا دەڭگەيى بويىنشا ءبىلىم الۋعا شەكتەۋلەر قاراستىرىلمايدى. ەگەر ءدىني بىرلەستىكتە قازاقستان اۋماعىندا ءتيىستى ءبىلىم بەرەتىن مەكەمە بولماعان جاعدايدا عانا وقىتۋ قاراستىرىلۋى مۇمكىن. اتالعان نورما بويىنشا قويىلاتىن شەكتەۋ ازاماتتاردىڭ ءبىلىم الۋداعى باستى قۇقىقتارىن بۇزبايدى"، − دەيدى قۇلەكەيەۆ.
