تالعارداعى ءجاسوسپىرىم شەرزات پولاتتىڭ ولىمىنە قاتىستى قىلمىستىق ءىس بويىنشا سوتتالعانداردىڭ تۋىستارى ونىڭ اكەسى قارجاۋباي نۇرىموۆقا قاتىستى قىلمىستىق ءىس قوزعاۋدى تالاپ ەتتى. وسىعان بايلانىستى باس پروكۋروردىڭ ورىنباسارى اسەت شىندالييەۆ پىكىر ءبىلدىردى، دەپ حابارلايدى Dalanews.kz.
2024 جىلعى قاراشادا 16 جاستاعى شەرزات بولاتتىڭ ولىمىنە بايلانىستى ۇستالعانداردىڭ جاقىندارى مالىمدەمە جاساپ، ءجاسوسپىرىمنىڭ اكەسى مەن اعاسىن جاۋاپقا تارتۋدى تالاپ ەتكەن ەدى. ولاردىڭ ايتۋىنشا، ءدال سولار مىلتىق پەن پىشاق الىپ شىققان، بۇل قاقتىعىستىڭ ورشۋىنە سەبەپ بولعان.
جاقىندا سوتتالعانداردىڭ تۋىستارى تاعى دا ۆيدەوۇندەۋ جاساپ، مارقۇمنىڭ تۋىستارىنا ايىپ تاققان.
بۇگىن ءماجىلىس كۋلۋارىندا جۋرناليستەر اسەت شىندالييەۆتەن شەرزاتتىڭ اكەسىنە قاتىستى ءىس قوزعالۋى مۇمكىن بە دەپ سۇرادى.
"مەن تەرگەۋگە الىنعانداردىڭ نەمەسە باسقا ادامداردىڭ سوزىنە سۇيەنىپ پىكىر ايتا المايمىن. قىلمىستىق ءىس قوزعاۋ ءۇشىن جەتكىلىكتى دالەلدەر بولۋى كەرەك. ءىس قوزعاۋ تۋرالى شەشىمدى قىلمىستىق قۋدالاۋ ورگانى قابىلدايدى"، – دەپ جاۋاپ بەردى باس پروكۋروردىڭ ورىنباسارى.
سونىمەن قاتار، اسەت شىندالييەۆ تالدىقورعاندا وتكەن سوت پروسەسىنە دە تۇسىنىكتەمە بەردى.
"شەرزات پولاتتىڭ ولىمىنە قاتىستى سوت ۇكىمى ءالى زاڭدى كۇشىنە ەنگەن جوق. بارلىق تاراپتىڭ اپەللياسيالىق شاعىم تۇسىرۋگە قۇقىعى بار. مەنىڭ بىلۋىمشە، سوت پروسەسىن كەز كەلگەن قازاقستاندىق اشىق باقىلاۋعا مۇمكىندىك الدى. سوت ءادىل، اشىق جانە وبەكتيۆتى ءوتتى دەپ سانايمىن. ۇكىم شىعارۋ كەزىندە بارلىق ايعاقتار مەن كۋالىك مالىمەتتەر ەسكەرىلدى. مۇنداي اشىق سوتتار – ءادىل شەشىمدەر قابىلدانىپ جاتقانىن جانە ەشتەڭە جاسىرىلمايتىنىن كورسەتۋگە باعىتتالعان"، – دەدى باس پروكۋراتۋرا وكىلى.
ەسكە سالايىق: شەرزات پولاتتىڭ ولىمىنە قاتىستى ءىس بويىنشا ۇكىم 5 ماۋسىمدا شىقتى. باس ايىپتالۋشى 23 جىلعا سوتتالدى. قالعان ايىپتالۋشىلارعا 1،5 جىلدان 20 جىلعا دەيىن تۇرمە جازاسى تاعايىندالدى.
