Talǵardaǵy jasóspirim Sherzat Polattyń ólimine qatysty qylmystyq is boiynsha sottalǵandardyń týystary onyń ákesi Qarjaýbai Nurymovqa qatysty qylmystyq is qozǵaýdy talap etti. Osyǵan bailanysty Bas prokýrordyń orynbasary Áset Shyndaliev pikir bildirdi, dep habarlaidy Dalanews.kz.
2024 jylǵy qarashada 16 jastaǵy Sherzat Bolattyń ólimine bailanysty ustalǵandardyń jaqyndary málimdeme jasap, jasóspirimniń ákesi men aǵasyn jaýapqa tartýdy talap etken edi. Olardyń aitýynsha, dál solar myltyq pen pyshaq alyp shyqqan, bul qaqtyǵystyń órshýine sebep bolǵan.
Jaqynda sottalǵandardyń týystary taǵy da videoúndeý jasap, marqumnyń týystaryna aiyp taqqan.
Búgin Májilis kýlýarynda jýrnalister Áset Shyndalievten Sherzattyń ákesine qatysty is qozǵalýy múmkin be dep surady.
"Men tergeýge alynǵandardyń nemese basqa adamdardyń sózine súienip pikir aita almaimyn. Qylmystyq is qozǵaý úshin jetkilikti dálelder bolýy kerek. Is qozǵaý týraly sheshimdi qylmystyq qýdalaý organy qabyldaidy", – dep jaýap berdi Bas prokýrordyń orynbasary.
Sonymen qatar, Áset Shyndaliev Taldyqorǵanda ótken sot protsesine de túsinikteme berdi.
"Sherzat Polattyń ólimine qatysty sot úkimi áli zańdy kúshine engen joq. Barlyq taraptyń apelliatsiialyq shaǵym túsirýge quqyǵy bar. Meniń bilýimshe, sot protsesin kez kelgen qazaqstandyq ashyq baqylaýǵa múmkindik aldy. Sot ádil, ashyq jáne obektivti ótti dep sanaimyn. Úkim shyǵarý kezinde barlyq aiǵaqtar men kýálik málimetter eskerildi. Mundai ashyq sottar – ádil sheshimder qabyldanyp jatqanyn jáne eshteńe jasyrylmaitynyn kórsetýge baǵyttalǵan", – dedi Bas prokýratýra ókili.
Eske salaiyq: Sherzat Polattyń ólimine qatysty is boiynsha úkim 5 maýsymda shyqty. Bas aiyptalýshy 23 jylǵa sottaldy. Qalǵan aiyptalýshylarǵa 1,5 jyldan 20 jylǵa deiin túrme jazasy taǵaiyndaldy.
