تٸلشٸلەر الدىمەن قازىعۇرت اۋدانىنداعى تۇربات اۋىلدىق وكرۋگٸندەگٸ باقشا ٶنٸمدەرٸمەن اينالىساتىن «سايدۋسمان اتا» شارۋا قوجالىعىنىڭ جۇمىسىمەن تانىستى. جەتٸ بٸردەي وتباسى مٷشەلٸك ەتەتٸن قوجالىق 2012 جىلى قۇرىلعان. قوجالىق تٶراعاسى سايدالى تۇرسىنوۆ جوبانى باستاۋعا جەكە قاراجاتىنان 45 ملن. تەڭگە جۇمساعان.
– 2017 جىلى 500 مىڭ تٷپ كٶشەت دايىندالدى. ال 2018 جىلى 1,5 ملن. تٷپ كٶشەت دايىنداپ, وبلىس كٶلەمٸندە ساتىلىمعا شىعارۋدى جوسپارلاپ وتىرمىز. سونداي-اق, 2017 جىلدىڭ بٸرٸنشٸ ماۋسىمىندا 2,5 گەكتار جىلىجايعا قىزاناق ەگٸپ, 210 توننا ٶنٸم الساق, ەكٸنشٸ ماۋسىمدا سول ورىنعا قييار ەگٸپ, 140 توننا ٶنٸم جينادىق. تاۋارىمىزعا دەگەن سۇرانىس استانا, الماتى قالالارىنان بٶلەك, رەسەيدەن تٷسٸپ جاتىر, – دەدٸ سايدالى تۇرسىنوۆ.
قازٸرگٸ تاڭدا قوجالىقتا 35 ادام تۇراقتى جۇمىسپەن قامتىلسا, 40 ادام ماۋسىمدىق جۇمىستارعا تارتىلادى. ورتاشا ايلىق جالاقىلارى 50 مىڭ تەڭگە كٶلەمٸندە. قوجالىق يەسٸ الداعى ۋاقىتتا شارۋاشىلىعىن مال بورداقىلاۋ الاڭى مەن ينتەنتسيۆتٸ باۋمەن تولىقتىرۋدى جوسپارلاپ وتىر.
باق ٶكٸلدەرٸ كەيٸن تۇربات اۋىلدىق وكرۋگٸندەگٸ مال بورداقىلاۋمەن اينالىساتىن «سايداحمات اتا» شارۋا قوجالىعىنا ايالدادى. 25 ادامدى تۇراقتى جۇمىسپەن قامتىپ وتىرعان قوجالىق بٷگٸندە 200-گە جۋىق اقباس تۇقىمدى ٸرٸ قارانى باعىپ وتىر. مال بورداقىلاۋ الاڭىن ٸسكە قوسۋعا 15 ملن. تەڭگە قارجى جۇمسالىپتى. ونىڭ 3 ملن. تەڭگەسٸن اۋىل شارۋاشىلىعىن قولداۋ قورىنان نەسيەگە العان.
وقو ەكٸمٸنٸڭ باسپاسٶز قىزمەتٸ
