2025 جىلعى 24 مامىردا شاردارا اۋدانىنا قاراستى قوسسەيىت اۋىلدىق وكرۋگىندەگى “سىرداريا” جالپى ءبىلىم بەرەتىن مەكتەپتىڭ 2005 جىلعى تۇلەكتەرى وزدەرىنىڭ 20 جىلدىق مەرەيتويى اياسىندا قايىرىمدىلىق شاراسىن وتكىزدى. ولار اۋىل تۇرعىنى باقتىباي قۇربانوۆقا ءۇش بولمەلى تۇرعىن ءۇيدى سىيعا تارتتى، – دەپ حابارلايدى Dalanews.kz
ساۋاپتى ءارى سالتاناتتى ءىس-شاراعا شاردارا اۋدانى اكىمىنىڭ ورىنباسارى بەيسەنباي تۋرەبەكوۆ ارنايى قاتىسىپ، باسپانالى بولعان وتباسىنى قۇتتىقتاپ، يگى ىسكە مۇرىندىق بولعان تۇلەكتەرگە اۋدان اكىمىنىڭ العىس حاتىن تابىستادى.
– قۇرمەتتى قوسسەيىت اۋىلىنىڭ تۇرعىندارى مەن ءقادىرلى تۇلەكتەر! سىزدەردىڭ بىرلىك پەن ىنتىماقپەن اتقارعان يگى ىستەرىڭىزدىڭ ناتيجەسىندە ءبىر وتباسى شاتتىققا بولەنىپ وتىر. وسىنداي ازاماتتىق ارەكەتتەر ەلدىڭ بەرەكەسىن ارتتىرادى. بارشاڭىزعا زور ريزاشىلىعىمدى بىلدىرەمىن، – دەدى ب.تۋرەبەكوۆ.
شارا بارىسىندا قوسسەيىت اۋىلدىق وكرۋگىنىڭ اكىمى نۇربول جاينار مەن اۋىل ءبيى باۋىرجان تولەگەنوۆ جۇرەكجاردى لەبىزدەرىن ءبىلدىرىپ، تۇلەكتەرگە اق باتالارىن بەردى.
