سۋدان قۋات وندىرەتىن كاسىپورىن ءقازىر تۇبەگەيلى جاڭعىرتۋ باعدارلاماسى ارقىلى جۇمىس باستاعان. 2020 جىلدىڭ ناۋرىز ايىنا دەيىن 4 سۋ اگرەگاتىنىڭ بارلىعى جاڭارتىلادى.
ولار كەڭەس كەزەڭىنەن كەلە جاتقان ەسكى تۋربينالار. شامامەن جارتى عاسىردان بەرى جۇمىس ىستەپ تۇر. 4 گيدرواگرەگات ىسكە قوسىلسا، وندا ساعاتىنا 126 مۆت، ال تاۋلىگىنە 3 ميلليون 24 مىڭ كۆت ساعات توك وندىرىلەدى. شاردارا سۋ ەلەكتر ستانسياسى ءقازىردىڭ وزىندە قولدانىستاعى 2 سۋ اگرەگاتىمەن ساعاتىنا 50 مۆت توق وندىرۋدە. سۋ قويماسىندا 2 ميلليارد 807 ميلليون تەكشە مەتر سۋ بار.
«ءقازىر تىرشىلىك ءنارىن قورعا جينايتىن كەزەڭ»، – دەيدى ماماندار. ال سۋ ەلەكتر ستانسياسىندا تۇبەگەيلى جاڭعىرتۋ جۇمىسى قارقىن العان.
مۇندا ءتورت سۋ اگرەگاتىنىڭ ءبىرىنشىسى پايدالانۋعا بەرىلەدى. تەحنولوگيالىق جابدىقتىڭ سىناعى ويداعىداي اياقتالعان. ەندى نەگىزگى قۇرىلىس-مونتاج جۇمىستارى جۇرگىزىلۋدە.
باقىتبەك جاڭابايەۆ، شاردارا سۋ ەلەكتر ستانسياسىنىڭ باسشىسى: «شاردارا سۋ ەلەكتر ستانسياسىنىڭ جالپى قۋاتتىلىعى قازىرگى تاڭدا 100 مۆت. ال تۇبەگەيلى جاڭعىرتۋ جۇمىستارىنان وتكەن سوڭ، ستانسيادا قۋات ءوندىرۋ 126 مۆت ۇلعايادى. مۇنداعى ءار سۋ اگرەگاتى ءقازىر 20 مۆت توق بەرسە، جاڭعىرتۋدان سوڭ 32-35 مۆت قۋات وندىرە الاتىن بولادى. ماقساتىمىز – وتاندىق ەلەكتر ەنەرگيا سالاسىنا ءوز ۇلەسىمىزدى قوسۋ».
