Sýdan qýat óndiretin kásiporyn qazir túbegeıli jańǵyrtý baǵdarlamasy arqyly jumys bastaǵan. 2020 jyldyń naýryz aıyna deıin 4 sý agregatynyń barlyǵy jańartylady.
Olar Keńes kezeńinen kele jatqan eski týrbınalar. Shamamen jarty ǵasyrdan beri jumys istep tur. 4 gıdroagregat iske qosylsa, onda saǵatyna 126 MVt, al táýligine 3 mıllıon 24 myń kVt saǵat tok óndiriledi. Shardara sý elektr stansıasy qazirdiń ózinde qoldanystaǵy 2 sý agregatymen saǵatyna 50 MVt toq óndirýde. Sý qoımasynda 2 mıllıard 807 mıllıon tekshe metr sý bar.
«Qazir tirshilik nárin qorǵa jınaıtyn kezeń», – deıdi mamandar. Al sý elektr stansıasynda túbegeıli jańǵyrtý jumysy qarqyn alǵan.
Munda tórt sý agregatynyń birinshisi paıdalanýǵa beriledi. Tehnologıalyq jabdyqtyń synaǵy oıdaǵydaı aıaqtalǵan. Endi negizgi qurylys-montaj jumystary júrgizilýde.
Baqytbek Jańabaev, Shardara sý elektr stansıasynyń basshysy: «Shardara sý elektr stansıasynyń jalpy qýattylyǵy qazirgi tańda 100 MVt. Al túbegeıli jańǵyrtý jumystarynan ótken soń, stansıada qýat óndirý 126 MVt ulǵaıady. Mundaǵy ár sý agregaty qazir 20 MVt toq berse, jańǵyrtýdan soń 32-35 MVt qýat óndire alatyn bolady. Maqsatymyz – otandyq elektr energıa salasyna óz úlesimizdi qosý».
