كۇن تارتىبىندەگى ماسەلەلەردى تالقىلاۋ جابىق ەسىك جاعدايىندا ءوتتى. جينالىستان سوڭ تاجىكستاننىڭ سىرتقى ىستەر ءمينيسترى سيرودجيددين مۋحريددين ۇيىم ەلدەرى اۋعانستانداعى جاعدايدى تالقىلاعانىن مالىمدەدى. «ءبىز كواليسيا كۇشتەرى اۋعانستاننان شىعارىلعان سوڭ وندا قالىپتاسقان جاعدايعا الاڭدايمىز» دەدى مينيستر.
شىۇ سىرتقى ىستەر مينيسترلەرى ۇيىمعا مۇشە ەلدەر مەن ولاردىڭ كورشىلەرىنىڭ قاۋىپسىزدىگى قامتاماسىز ەتىلمەي، ۇيىم كەڭەستىگىندە تۇراقتى دامۋ بولمايدى دەپ ەسەپتەيدى.
بيىل قىركۇيەكتە دۋشانبەدە شىۇ-عا مۇشە ەلدەردىڭ باسشىلارىنىڭ ءسامميتى وتەدى. مينيسترلەر كەڭەسىنىڭ 14 شىلدەدەگى جينالىسىندا دۋشانبەدەگى سامميت تۋرالى قاۋلى قابىلداندى. سامميتتە 2022-2024 جىلدارى تەرروريزم، سەپاراتيزم جانە ەكسترەميزممەن كۇرەستە ۇيىمعا مۇشە ەلدەرىنىڭ ارىپتەستىگى باعدارلاماسى قارالادى.
ساراپشىلار وسى ۇيىمعا مۇشە ەلدەر اۋعانستانداعى جاعدايعا ىقپال ەتىپ، ەلدە تۇراقتىلىق ورناۋىنا كومەكتەسە الادى دەپ ەسەپتەيدى.
شانحاي ىنتىماقتاستىعى ۇيىمىنا جۇڭگو، ءۇندىستان، قازاقستان، قىرعىزستان، پاكىستان، رەسەي، تاجىكستان جانە وزبەكستان مۇشە. ساراپشىلاردىڭ دەنى كواليسيانى رەسەي مەن قىتايدىڭ ساياسي قۇرالى رەتىندە قاراستىرادى.
«شانحاي بەستىگى» جۇڭگو مەن بۇرىنعى سوۆەتتىك رەسپۋبليكالار اراسىنداعى شەكارا ماسەلەلەرىن شەشۋ ءۇشىن قۇرىلعان. اۋعانستان، بەلارۋس، يران جانە موڭعوليا ۇيىمدا باقىلاۋشى مارتەبەسىنە يە. ارمەنيا، ءازىربايدان، كامبودجا، نەپال، تۇركيا جانە شري-لانكا شىۇ-عا ارىپتەس ەلدەر سانالادى.
