الماتى وبلىسىنان سايلانعان سەنات دەپۋتاتى جانبولات جورگەنبايەۆ جاقىندا قاماۋعا الىنعان حاسان قاسىمبايەۆپەن تۋىس ەكەنىن راستادى، - دەپ حابارلايدى Dalanews.kz Tengrinews.kz-كە سىلتەپ.
بۇعان دەيىن دەرەككوزدەر سەنات دەپۋتاتى جانبولات جورگەنبايەۆ حۋتورلىق حاسان قاسىمبايەۆتىڭ تۋىسى ەكەنىن حابارلاعان بولاتىن.
"ءبىزدىڭ دەرەككوزدەرىمىزدىڭ مالىمەتىنشە، الماتى وبلىسىنان سايلانعان سەناتور جانبولات جورگەنبايەۆ قاماۋعا الىنعان حاساننىڭ اعاسى. ولاردىڭ اناسى - تۋعان ءاپالى-سىڭلى.
قازىرگى تاڭدا تەرگەۋ بارىسىندا ونىڭ بۇل جاعدايعا قانشالىق اسەر ەتكەنى تەكسەرىلىپ جاتىر. ول تالعار اپپاراتىنىڭ باسشىسىن - حاساننىڭ اعاسىن اتىشۋلى وقيعادان كەيىن جۇمىستان قۋماۋىن سۇراعان دەگەن اقپارات بار"، - دەلىنگەن دەرەككوز حابارلاماسىندا.
"ءيا، مەن الەۋمەتتىك جەلىدەگى جازبالاردى كوردىم. ول اقپاراتقا سەنسەك مەن قاسىمبايەۆتارعا قاتىستى تالعاردا بولعان جاعدايعا اسەر ەتىپپىن.
اسلان قاسىمبايەۆتىڭ قىزمەتىنە قاتىستى ەشكىمگە ەشقانداي ءوتىنىش ايتپاعانىمدى رەسمي تۇردە مالىمدەيمىن. ونىڭ ۇستىنە حاسان قاسىمبايەۆقا قاتىستى ءجۇرىپ جاتقان تەرگەۋگە دە ەشقانداي اسەر ەتكەن جوقپىن"، - دەيدى جورگەنبايەۆ.
دەپۋتات قاسىمبايەۆپەن الىس تۋىس ەكەنىن ايتتى.
"تۋىس ەكەنىمىزگە قاتىستى: ءيا، ول مەنىڭ الىس تۋىسىم ەكەنىن راستايمىن. قازاقتا تۋىس كوپ قوي. ءبىراق ۇنەمى بايلانىستا جۇردىك دەپ ايتا المايمىن. ارى كەتسە تويلاردا نەمەسە تۋىستار جينالىپ قالاتىن جەرلەۋ سياقتى راسىمدەردە كەزدەسىپ قالاتىنبىز"، دەيدى دەپۋتات.
ەسكە سالايىق،حاسان قاسىمبايەۆتىڭ ءوزى ەكى ايعا قاماۋعا الىنعان بولاتىن.
كەيىن پوليسيا مالىمدەمە جاساپ، حاسان قاسىمبايەۆتىڭ ۇستالۋى - شەرزاتتىڭ ولىمىنە بايلانىستى ەمەس ەكەنىن حابارلادى.
پد مالىمەتىنشە، قاسىمبايەۆ 2 قاراشادا ۇستالىپ، ۋاقىتشا ۇستاۋ يزولياتورىنا قاماۋعا الىنعان. ول ازامات ا.-نى ۇرلاپ، دەنساۋلىعىنا اۋىر زيان كەلتىردى دەگەن كۇدىككە ىلىنگەن.
وقيعا 2021 جىلدىڭ ماۋسىمىندا بولعان.
"قازىرگى ۋاقىتتا قىلمىستىڭ بارلىق ءمان-جايىن جان-جاقتى، تولىق جانە وبەكتيۆتى زەرتتەۋدى قامتاماسىز ەتۋ ءۇشىن تەرگەۋ ارەكەتتەرىنىڭ كەشەنى جۇرگىزىلىپ جاتىر. ءىس ماتەريالدارى بۇلتارتپاۋ شاراسىن سانكسيالاۋ ءۇشىن سوتقا جىبەرىلدى"، - دەدى بۇعان دەيىن الماتى وبلىستىق پد وكىلدەرى.
