د.ادىلبەكوۆتىڭ پىكىرىنشە، جىلدىق 6%-عا دەيىنگى پايىزدىق مولشەرلەمەنى مەملەكەتتىك سۋبسيديالاۋ تۇرىندە شاعىن جانە ورتا بيزنەستى مەملەكەتتىك قولداۋدىڭ قابىلدانعان شاراسى تەك ەكونوميكانىڭ زارداپ شەككەن سالالارىمەن شەكتەلگەندىكتەن شوب-تى نەسيەلەۋدىڭ ءوسۋىن قامتاماسىز ەتە المايتىنىن اشىپ ايتتى.
قازاقستان قارجىگەرلەرى قاۋىمداستىعى باسشىسىنىڭ اقپاراتى بويىنشا، توتەنشە جاعداي كەزىندە نەسيەلىك تولەم مىندەتتەمەلەرى شوب-تىڭ 1 پايىزىنا عانا كەيىنگە قالدىرعانىن اتاپ ءوتۋ كەرەك.
سەناتور پرەمەرگە جولداعان دەپۋتاتتىق ساۋالىندا: «وسىلايشا، بانك سەكتورىنىڭ شوب-تى نەسيەلەندىرۋگە ءىس جۇزىندە قاتىسپايتىنى تۋرالى قورىتىندى جاساۋعا بولادى. سۋبسيديالانعان پايىزدىق مولشەرلەمەمەن جەڭىلدەتىلگەن نەسيە بەرەتىن جەكە بانكتەر شوب-قا نەسيە بەرۋگە مۇددەلى ەمەس» دەيدى.
سونىمەن قاتار، دەپۋتات مەملەكەتتىك ساتىپ الۋدى جۇزەگە اسىرۋ تەتىكتەرىندەگى ولقىلىقتار تۋرالى حابارلادى.
– مەملەكەتتىك ساتىپ الۋلاردى جۇزەگە اسىرۋ تاجىريبەسى «تۇراقتى جەڭىمپازداردىڭ» بار ەكەندىگىن كورسەتەدى، ولارمەن كەلىسىمشارتتار جاسالادى. ماسەلەن، ۋاكىلەتتى ورگاننىڭ دەرەكتەرى بويىنشا 2018 جىلى 49 مىڭ جەتكىزۋشى كونكۋرستاردى بەس رەتتەن ارتىق ۇتىپ العان، – دەپ مالىمدەدى د.ادىلبەكوۆ.
قورىتىندىلاي كەلە، سەنات دەپۋتاتى قولدانىستاعى زاڭنامادا اكىمدىكتەردىڭ بوس اۋىل شارۋاشىلىعى جەر ۋچاسكەلەرىن كونكۋرستارعا شىعارۋىنا قاتىستى سۇيەنەتىن نورمالاردىڭ جوقتىعىن ايتتى. ياعني، اكىمدىكتەر قانداي بوس جەر تەلىمى جانە ونىڭ قاشان كونكۋرسقا شىعارىلاتىنىن وزدەرى شەشەدى.
